Талдықорғанда өткен Тамыз конференциясына облыс әкімі Амандық Баталов пен Білім және ғылым министрлігі Мектепке дейінгі және орта білім департаменті директорының орынбасары Сәуле Қабимолдаева қатысты. Кеңес жұмысы жылдағы сүрлеуден жаңылмастан облыстың білім саласының жетістіктері туралы көрме-таныстырылымды тамашалудан басталды.
Талдықорғандағы №42 балабақша тәрбиеленушілері өздері үйренген робототехниканың алғашқы әліппесі бойынша роботтармен жұмыс істеу машықтарын көрсетті. «Швейцариялық-американдық Genius академиясы» ЖШС-мен бірлесіп жүзеге асырып жатқан ағылшын тілінде оқу мен оқыту бойынша «Инновациялар мен заманауи технологиялардың халықаралық класы» жобасы назарға ұсынылды. Мектепке дейінгі білім беру ұйымдарына электронды кезекке қою, бірінші сыныпқа қабылдауда электронды құжат қабылдау қызметтері де таныстырылды.
Басты баяндаманы оқыған облыстық білім басқармасының басшысы Дәурен Жүнісов кемшіліктерді тасада қалдырып, жетістіктерді көбірек санамалады. Соңғы он жыл бойы Алматы облысындағы білім саласының бюджеті миллиардтап өскенімен, конференция сайын айтылатын апатты мектептер мен үшауысымда оқытатын білім ошақтарын жоямыз деген міндеттеме әлі күнге толық шешімін таппай отыр. Соңғы бес жылда облыс халқының 300 мыңға өскенін, биыл облыста 50 мыңға жуық бала бірінші сыныпқа баратынын ескерсек, үшауысымды мектеп мәселесі тіптен күрделене түсері анық. Сонымен бірге, балалардың өздеріне қол салуының жиілегені де көңіл алаңдатады. Кейбір ауылдардағы балалар биыл да білім беруге лайықталмаған орындарға сабаққа барады. Мектептердегі әжетханалар мәселесі де күйіп тұр. Білім саласында жақсы істер атқарылып жатқаны анық. Оны ешкім жоққа шығара алмайды. Дегенмен осы салаға қазынадан қаралатын қаржы осыдан 20 жыл бұрынғы тұтас облыстың бюджетінен асып кеткеніне қарамастан қордаланған проблемалар да жетіп артылады.
Білім және ғылым министрлігі мектепке дейінгі және орта білім департаменті директорының орынбасары Сәуле Қабимолдаева да өзі осы облыста істеген жылдарға қарағанда білім саласын қаржыландырудың еселеп артқанын еске салды. Соған сай Алматы облысының жетістіктері, соның ішінде білім саласын цифрландыру, қосымша білім беруді дамыту ісі, мектепке дейінгі біліммен қамту көрсеткіштері көңіл тоғайтарлық екенін атап өтті. Бұл кісі де орайын келтіріп, олқылықтарды орағытып өтті.
Жиынды қорытындылаған Амандық Баталов облыстағы білім саласының негізгі проблемаларының бірі – үшауысымды мектептер мәселесі екеніне ерекше тоқталды.
Қазіргі кезде өңірдегі үшауысымда оқытуды болдырмау үшін жоспарға сәйкес 3000 орынды 7 мектептің құрылысы жүргізілуде, соның бесеуі жаңа оқу жылына пайдалануға берілсе, екеуі келер жылы оқушыларға есігін айқара ашады. Сонымен бірге, шағын жинақталған мектептер жағдайы да аса өзекті. Ауылдардағы жұрт жаппай қалаларға, ірі елдімекендерге көшіп жатқанына байланысты, алдағы жылдары мұндай мектептер саны кемудің орнына арта берері анық. Бірақ бұл мәселені білім ошақтарын жабу арқылы шешпей, елді алаңдатпайтын, ауылдарды қаңыратпайтын басқа жолдарды қарастырған жөн. Елбасының «Бес әлеуметтік бастамасындағы» арнаулы орта кәсіби білім беруді дамыту, студенттерді жатақханамен қамту, сол сияқты жасөспірімдер арасындағы суицидтің алдын алу, көпбалалы отбасы балаларына көмек көрсету де шешімін күткен мәселелер жетерлік.
Алматы облысындағы білім саласының бюджеті биылғы жылы 200,2 млрд теңгені құрап, өткен жылмен салыстырғанда 43,2 млрд теңгеге артыпты. Биыл 9,9 млрд теңгеге 15 мектеп, 4 колледж салынуда. Ал материалдық-техникалық базаны нығайтуға 8,2 млрд теңге қарастырылған. Өңірдегі 34 колледж дуальды оқыту модуліне енгізіліп, олардың кәсіпорындармен байланысы нығайып келеді.
Жаңа оқу жылында Алматы облысында 18 806 көпбалалы және аз қамтылған отбасылардың 1-4 сынып балаларын ыстық тамақпен қамтамасыз етуге қосымша 450 млн теңге қаржы бөлініпті. Жалпы, 768 мектептің 572-сінде ыстық тамақ ұйымдастырылған. Кеңесте көпбалалы және табысы төмен отбасылар балаларының жоғары білім алуына мүмкіндіктер молайғаны да айтылды. Биыл облыстағы еңбек нарығының қажеттіліктеріне байланысты жергілікті бюджеттен жалпы конкурсқа – 170, көпбалалы және аз қамтылған отбасы балаларына жергілікті бюджеттен – 80, республикалық бюджет есебінен 540 білім беру гранты бөлініпті. Конкурстық комиссия шешімімен әкімдіктің 250 гранты, республикалық бюджеттен 331 білім беру гранты тағайындалған.
Ұстаздардың дәстүрлі жиынында облыстың 500-ден астам мұғалімі марапатталып, оларға «Құрмет» ордені, «Ы.Алтынсарин» «Қазақстан Республикасы білім беру ісінің Құрметті қызметкері» төсбелгілері және басқа да наградалар тапсырылды. Облыс әкімінің Құрмет грамотасы мен алғысхаты берілді.
Болат АБАҒАН
Алматы облысы