Ұлттық академиялық кітапханада Қазақстанның Конституциясы күніне арналған «Конституцияның цифрлық өркениет дәуірінде мемлекет пен қоғамның трансформациялануы жағдайындағы рөлі» тақырыбында дөңгелек үстел өтті.
Елдегі әлеуметтік, құқықтық және демократиялық мемлекеттің қағидаттарын бекітуде Конституцияның рөлі мен әлеуетін жан-жақты талқылауға арналған форумды Конституциялық Кеңес ұйымдастырды. Оған Қазақстанның мемлекеттік құрылымдарының басшылары, Конституциялық Кеңес мүшелері, Парламент депутаттары, Үкімет мүшелері, құқық қорғау мекемелерінің өкілдері, сондай-ақ белгілі отандық құқықтанушы ғалымдар қатысты.
Конституция – егемендік пен тәуелсіздікті бекітетін аса маңызды құжат. Мемлекеттіліктің, қоғамдағы келісім мен тұрақтылықтың берік негізі. Негізгі заңды құрметтеу және бұлжытпай сақтау – алға қойылған ауқымды мақсаттарға жетудің кепілі. Әсіресе, мемлекеттік органдар Конституцияға тиімді жұмыс істейтін құқықтық құжат ретінде қарауы қажет. Ата заң күніне орай өткен дөңгелек үстелде Конституциялық Кеңес төрағасы Қайрат Мәми осылай деді. Оның айтуынша, бұл үшін конституциялық дүниетанымды дамыту маңызды.
– Конституция – саяси, құқықтық, экономикалық, мәдени-гуманитарлық салалардың даму бағыттарын айқындайды. Сондықтан қазіргі таңда қабылданбақ шаралардың өміршеңдігі Ата заңның жасампаз әлеуетінің толыққанды жүзеге асуымен тікелей байланысты. Біз барлық күш-жігерімізді Ата заңның жоғары заң күшін және тікелей қолданылуын қамтамасыз етуге бағыттауымыз керек, – деді Конституциялық Кеңестің төрағасы Қайрат Мәми.
Шараға қатысушылар, мемлекет пен қоғамның трансформациялануы кезеңінде құқыққа деген тың көзқарас керегін тілге тиек етті. Сондай-ақ құқық қорғау жүйесін жетілдіру, жаппай цифрландыру процесінде жеке тұлғаның мүдделерін қорғау кепілдігін нығайту мәселелері талқыланды. Жоғарғы соттың, Бас прокуратураның, Мемлекеттік қызмет істері агенттігінің, Әділет, Денсаулық сақтау, Ақпарат және қоғамдық даму министрліктерінің және ғылыми қоғамның өкілдері Конституция негіздерін іске асыру мәселелері бойынша баяндама жасады.
– Жалпы, IT технологияларды кеңінен енгізу азаматтардың конституциялық құқықтары мен бостандықтарын жедел және тиімді қорғау үшін, сондай-ақ сот және құқық қорғау органдарының жұмысын оңтайландыруға қолайлы жағдай жасайды. Сондықтан азаматтардың конституциялық құқықтары мен бостандықтарын іске асыру зор маңызға ие, – деді Цифрлық даму, инновациялар және аэроғарыш өнеркәсібі министрі Асқар Жұмағалиев.
Сондай-ақ Президент Әкімшілігі басшысының орынбасары Ә.Рақышева, Қазақстан Республикасының Тұңғыш Президенті – Елбасы Қоры атқарушы директорының орынбасары И.Рогов қатысушыларға құттықтау сөзін арнады.
Дөңгелек үстел аясында Конституцияның үстемдігін қамтамасыз ету және қазақстандықтардың конституциялық мәдениетін арттыру ісі бойынша журналистер арасында ұйымдастырылған конкурстың жеңімпаздарын марапаттау рәсімі өтті. Бұл конкурс былтыр Конституция күніне арналған халықаралық конференцияда жарияланған болатын.
Конституциялық Кеңестің Төрағасы Қ.Мәми жеңімпаздарды құттықтай отырып, оларға конкурсқа белсенді қатысқаны үшін алғыс айтты. Лауреаттарға Құрмет грамоталары және естелік сыйлықтар берілді.
Конституциялық Кеңестің Төрағасы бұқаралық ақпарат құралдарының өкілдеріне арнаған сөзінде бүгінгі таңда конституциялық-құқықтық сипаттағы мәселелерде маманданған кәсіби журналистерге деген үлкен сұраныс барын атап өтті.
Ақбота ӘЛІМ