Тимур СҮЛЕЙМЕНОВ,
Президент Әкімшілігі басшысының орынбасары:
Мемлекеттік қызметшілердің жауапкершілігі күшейеді
– «Халық үніне құлақ асатын мемлекетті» құру, азаматтар, бизнес және мемлекеттік аппарат арасында тиімді өзара іс-қимылды жолға қою қажеті – Мемлекет басшысы Жолдауының негізгі ұстыны.
Осы тәсілдемені жүзеге асыру барлық салаларда үдемелі әлеуметтік-экономикалық дамуға бағытталған анағұрлым сарабдал шешімдер қабылдауға мүмкіндік береді.
Экономикалық салада Жолдау аясында шағын және орта бизнесті қолдау жүйесін қайта жандандыру мәселесіне ерекше көңіл бөлініп отыр. Бұл ретте жаңа жобаларға басымдық берілуі тиіс, тиісінше, жаңа жұмыс орындары да соларда құрылады, қосымша салық түсімдерін де солар арттырады. Бұған қоса, отбасылық шағын және ұсақ бизнестердің ашылуын ынталандыруға, көпбалалы аналардың үйде отырып жұмыс істеуіне жол ашуға екпін түсіру керек.
Шағын және орта бизнесті, әсіресе, жоғары өнімділікті, сондай-ақ экспортқа бағытталған өндірушілерді қаржылық, салықтық және әкімшілік ынталандыру шараларын жүзеге асыру қарастырылған.
Агроөнеркәсіптік кешен секторында суармалы егіс аудандарын арттыру жұмысын жандандыру, ауыл шаруашылығы шикізатын өңдеу үлесін ұлғайту, сонымен қатар экономикалық айналымға қайта тарту үшін пайдаланылмай жатқан жерлерді кері алып қою жөнінде тапсырма берілді.
Ел Президенті квазимемлекеттік сектордың тиімділігін арттыру, мемлекеттік кәсіпорындар санын қысқарту, мемлекеттік сатып алу рәсімдерін одан ары жақсарту, әсіресе, табиғи монополистер қызметінде және әлеуметтік маңызды тауарлардың жекелеген нарықтарында баға қалыптастыру ісін тәртіпке келтіру мәселелеріне жеке тоқталды.
Атап өту керек, азаматтар мен бизнестің рейдерлік фактілерінен, жекелеген шенеуніктердің озбырлығынан немесе әрекетсіздігінен қорғалуын күшейтуге бағытталған заңнамалық нормалар енгізілетін болады. Заңнамадағы барлық қарама-қайшылықтар мен дүдәмал тұстар азаматтар мен кәсіпкерлердің пайдасына қарай шешілуі тиіс.
Әлеуметтік қамсыздандыру саласындағы маңызды бастамалар – мүгедектерді қолдауды күшейту, балалар құқығын қорғау, бұқаралық спортты дамыту, халықтың аз қамтылған бөлігі үшін баспананың қолжетімділігін арттыру, әрбір нақты елдімекендегі көкейкесті инфрақұрылымдық мәселелерді шешу.
2020 жылдан бастап, педагогтердің жалақысы 25%-ға көтеріледі. Үкімет мәдениет қызметкерлерінің еңбекақысын көтеру параметрлерін анықтайды.
Үкімет пен Ұлттық банк алдына банктердің экономиканы несиелендіру көлемін арттыру, тұтынушылық несиелендіру нарығында шектен шығуды болдырмау, сондай-ақ зейнетақылық активтерді тиімді басқару міндеті қойылды.
Мемлекет басшысы атаулы әлеуметтік көмектің әділетті әрі ынталандырушы жүйесін түзу қажеттілігін ерекше атап өтті. Ондай көмек тек шынымен соған мұқтаж адамдарға ғана ұсынылуы тиіс.
Тұтастай алғанда, Президент қойған барлық міндеттерді табысты жүзеге асыру үшін шешім қабылдау үдерістерінің айқындылығын арттыруға, олардың қабылдануына тікелей халықтың өзін тартуға негізгі салмақ салынуы керек. Сонымен бірге, инвестиция тарту, еңбек өнімділігінің өсімі, шикізаттық емес экспорттың ұлғаюы, жұмыс орындарын ашу мәселелерінде өз алдарына қойылған міндетке қол жеткізуі үшін мемлекеттік қызметшілердің дербес жауапкершілігі күшейтіледі.
Мәулен ӘШІМБАЕВ,
Президент көмекшісі:
Жолдауда жаңашылдық өте көп
– Мемлекет басшысының Жолдауы – сарабдал жоспар. Онда Қ.Тоқаев халық үшін ең өзекті, кең талқыланып жүрген мәселелерді көтеріп, олардың шешімін ұсынды. Олардың ауқымы үлкен және экономикалық өркендеуге, Қазақстанды саяси дамытуға, әлеуметтік ахуалға қатысты болып келеді.
Жолдауда мемлекетіміздің алға қозғалуына жол ашатын бірқатар нақтылы шара ұсынылып отыр. Атап айтсам, Президенттің пәрменді шешімдерінің бірі – ұсақ және шағын бизнестің барлық нысанын алдағы 3 жыл бойы табыс салығынан босату. Бұл сөзсіз, қазақстандықтардың әл-ауқатын арттыруға, экономиканың үлкен бір бөлігін қолдауға, кәсіпкерлерді демеуге бағытталған.
Алдағы 2020 жылдың қаңтарынан бастап, ұсақ және шағын бизнесті тексеруге Президент жариялаған үш жылдық мораторий күшіне енеді. Бұл да кәсіпкерлер тарапынан үлкен резонанс, қызу құптау туғызады деген ойдамын.
Бұған қоса, Қасым-Жомарт Кемелұлы өзінің тұңғыш Жолдауында бизнес орта көтеріп жүрген ең көкейкесті проблемалардың біріне – экономиканы кредиттеу мәселесіне ден қойды. Кейінгі жылдары заңды тұлғаларды, компанияларды несиелендіру көлемі құлдырап кетті. Кредиттеусіз экономика дами алмайды. Сондықтан Ұлттық банкке, Үкіметке осы түйткілдің түйінін тарқату, кәсіпкерлерді қолжетімді әрі ұзақмерзімді несиемен қамтамасыз ету жөнінде тиісті тапсырмалар берілді.
Жалпы, экономика ұстыны болып есептелетін бизнесті қолдау бойынша бұл Жолдауда жаңашылдық өте көп. Олар отандық кәсіпкерліктің бәсекеге қабілеттілігін арттыруға септігін тигізуі қажет.
Мемлекет басшысы төл Жолдауында әлеуметтік мәселелерге де баса мән берді. Олардың қатарында білім беру және денсаулық сақтау жүйелерін ары қарай дамытумен, сондай-ақ театр, музей және басқа да мәдениет қызметкерлерінің жалақысын арттырумен байланысты мәселелер бар. Өйткені бертіндегі жалақы көтеруге бағытталған шаралардан мәдениет саласы тыс қалып келді. Олай болса, әлеуметтік қамқорлық саясаты тағы бір қырынан толығып отыр.
Бұдан бөлек, ел Президенті саяси салада жаңарулар одан ары жалғасатынын нақты мәлімдеді. Бұл бағытта Мемлекет басшысы қойған шешуші міндеттердің бірі – ең өзекті мәселелерді және маңызды шешімдерді талқылауға азаматтық қоғамды тарту болмақ.
Сонымен қатар Қ.Тоқаев Қазақстанда көппартиялылық ары қарай дамытылатынын жариялады. Қоғамымыз Жолдауда айтылған бастамаларды ықыласпен қабылдап, оларды іске асыруға ынта білдіреді деген сенімдемін.
Бейсенбай ТӘЖІБАЕВ,
Nur Otan партиясы Түркістан облыстық филиалы
төрағасының бірінші орынбасары:
Кеңесу мен келісу игілікке бастайды
– Ел Президенті Қасым-Жомарт Тоқаев өзінің Жолдауында қоғамдағы көптеген маңызды мәселені сөз етті. Соның бірі – партиялы құрылым процесін жалғастыру. Бұл ретте Президент Nur Otan партиясының өзге де саяси партиялармен серіктесе отырып жұмыс істеу қажеттігін айтты. Мемлекет басшысы осы тұста келісіп пішкен тонның келте болмайтынын нұсқап отыр. Яғни, Nur Otan партиясы нағыз қоғамшыл, нағыз халықшыл партияға айналуы тиіс.
Ол үшін барлық мүмкіндіктерді тиімді пайдаланып, өзге де саяси партиялар мен қоғамдық қозғалыстармен біте қайнасып, бірлесе әрекет етсе, ұтымды болары анық. Халықтың сенімін ақтаудан басқа ұлы мұрат жоқ. Бүгінгі нұротандықтар осы сөздің түп-төркінін терең ұғынып, қоғамдағы өзекті мәселелерді дер кезінде шешуге барынша атсалысатын болады.
Ел түрлі қиындықтар мен кедергілерге ұшырағанда Nur Otan-ға үміт артып, көмек сұрап келеді. Өткен 8 айдың өзінде біздің облыстық Қоғамдық қабылдауға 5 204 арыз-шағым түскен. Мұнда көтерілген мәселенің басым бөлігі шешімін тауып, тиісті көмек көрсетілді. Дегенмен қордаланған мәселелер жеткілікті. Оны бәріміз келісім үстелінде кеңесе отырып шешкеніміз дұрыс. Халықпен байланыс жаңаша форматта жандануы тиіс.
Рас, соңғы жылдары түйінді түйткілдер мінбелерде емес, көшелерде талқыланатын болып жүр. Яғни елімізде азаматтық қоғаммен диалог әлі дұрыс орныға алған жоқ. Билік пен халықтың арасында қоғамдық диалог дұрыс орнықпаса, еліміздегі татулық пен тұрақтылық туралы сөз қозғау бекер болады. Сондықтан әрбір мемлекеттік қызметкер осы байланыстың дұрыс орнығуына өзіндік үлес қосуы тиіс. Әрбір мемлекетшіл азамат халықтың мұң-мұқтажын тыңдаудан қашпау керек.
Билікке түйінді түйткілді дер кезінде көре білетін, оның шешілу жолын таба білетін азаматтар қажет. Сонда ғана кез келген түйткілдің түйінін тарқатуға болады. Осы ретте Қасым-Жомарт Кемелұлы: «Елбасымыздың «Ел бірлігі – ең басты қасиет» деген қанатты сөзі біздің айнымас қағидамыз. Береке мен бірлік, ақыл мен парасат халқымызды үнемі алға бастап келеді. Бағытымыз – айқын, жолымыз – ашық. Барлығымыз бірге болсақ еліміз бұдан да зор табысқа жетеді деп сенемін» деді.
Елдің дамуын әрбір отбасы сезінгенде ғана берекелі қоғам орнайды. Ал баспаналы болу – соның басты шарты. Бұл бағытта соңғы жылдары нәтижелі жобалар жүзеге асуда. Түркістан қаласының өзінде өткен аптада 700-дей әлеуметтік жағынан аз қамтылған отбасы баспанаға қол жеткізді. Бұл жұмыстар еселенері анық.
Мемлекет басшысы жеңілдетілген салық жүйесі, бизнеске қолайлы жағдай жасау, әлеуметтік-мәдени саланы қолдау, бала құқығын қорғау бағыттары бойынша еліміздегі басты проблемаларды атап көрсетті. Енді осы түйткілдерді тарқату үшін жұмылуымыз қажет.
Әйгерім ЕСЕНӘЛІ,
журналист, Nur Otan партиясының мүшесі:
Жастарға жасалған мүмкіндік
– Бүкіл Қазақ елі болып Жолдауды күттік. Қасым-Жомарт Кемелұлы сайлау науқанынан бастап әлеуметтік мәселеге ден қоятынын, азаматтық қоғамның негізгі күрмеуі шешілмеген мәселелерін қарайтыны белгілі болды. Саясаткер ретіндегі тәжірибесі бар тұлға. Әлеуметтік парақшасында Жолдауға қатысты алдын ала мәлімет берді. Президент берген тапсырмалар көптің көңілінде жүрген сұраққа нүкте қояды, нәтиже береді деген үміттеміз. Қылмыстық кодексті, жазаны қатаңдату жайында айтқаны жөн болды. Өзіме ұнағаны – шағын және орта бизнесті қолдауға арналған бағыт. Бірыңғай жинақтаушы зейнетақы қорындағы сомасын білімге немесе тұрғын үй мәселесіне жұмсауға байланысты айтқаны – жастарға үлкен мүмкіндік. Елдегі қаржыгерлер ақылдаса отырып, халыққа ыңғайлысын ойластырғанына қуаныштымыз. Президенттің сайлауалды бағдарламасының негізі – сабақтастық. Н.Назарбаев қашанда алдыңғы қатарға тарихтан үлгі ала отырып, болашаққа жоспар құру, болмыс пен құндылықты ұмытпау керегін бағдарламада айқындап көрсеткен. Қасым-Жомарт Тоқаев та осы сабақтастықпен жұмыс істеп келе жатқан, нақты жоспары бар саясаткер екенін таныта білді. Негізгі мамандығым – қазақ тілі мен әдебиеті пәнінің мұғалімі. Телеарна, мәдениет саласында 10-15 жыл жүрген адам ретінде әлеуметтік мәселеге баса мән беремін. Әлеуетіміз жақсарса, мәдени күйіміз түзеледі.