Медициналық қызметтерді қолданушының мәртебесі енді автоматтандырылған режімде анықталады. Бұл туралы Міндетті әлеуметтік медициналық сақтандыру (МӘМС) қоры хабарлады.
Қарағанды облысында іске қосылған Міндетті әлеуметтік медициналық сақтандырудың пилоттық жобасы аясында «Әлеуметтік медициналық сақтандыру қоры» КЕАҚ-ның төл жобасы – «Saqtandyrý» ақпараттық жүйесі сынақтан өткізіледі.
«МӘМС жағдайында медициналық көмекке жүгінгенде алдымен медициналық қызметті тұтынушының мәртебесін анықтап алу маңызды. Емхананың немесе аурухананың медициналық ақпараттық жүйесі «Saqtandyrý» АЖ-нен тұтынушының сақтандырылғаны немесе сақтандырылмағаны жайлы мәліметтерді сұратады. Соған қарай көмек кепілдендірілген тегін медициналық қызметтердің есебінен, не болмаса, кеңейтілген сақтандыру пакеті есебінен төленеді. Пациенттер үшін қосымша қиындықтар туындамайды, олар бұрынғыдай жеке басын куәландыратын құжатты көрсетуі тиіс. Әрі қарай медициналық ақпараттық жүйе барлық қажетті әрекеттерді өздігінен жүзеге асырады»,– делінген хабарламада.
Қарағанды облысындағы 1,4 миллион тұрғынның 549 мыңы – ресми түрде жұмыс істейді. Олар үшін жұмыс берушілер жарна төлейді. Бұдан бөлек, 2,5 мың адам бірыңғай жиынтық төлемін аударып отырады. Олар үшін жұмыс берушілер жарна төлейді. Пилоттық жобада олар 2020 жылдан бастап жарнасын мемлекет төлеп беретін әлеуметтік қорғалмаған азаматтармен қатар сақтандырылған адамның мәртебесін алады.
«Saqtandyrý» ақпараттық жүйесі пилоттық режімде сынақтан өтіп, ақпараттық қауіпсіздік жағы тексерілгеннен кейін өндірістік пайдалануға беріледі. Ал оны толығымен іске қосу үшін бірқатар мемлекеттік органға қарасты 10 ақпараттық жүйемен интеграциялау қажет. Олардың ішінде ҚР Денсаулық сақтау министрлігі, Еңбек және әлеуметтік даму министрлігі, «Азаматтарға арналған үкімет» мемлекеттік корпорациясы және т.б. бар. Қарағанды облысының медициналық ұйымдарын тиісті деңгейде цифрландырудан өткізбегенде «Saqtandyry» АЖ-сын сынақтан өткізу мүмкін болмайтын еді. Өңірде қордың тегін медициналық көмек көрсететін 118 медициналық ұйымы бар.
Медициналық құжаттама тек сандық форматта жүргізіледі. Халықты тіркеу регистрінде бекітілген облыстың әрбір тұрғыны жеке электрондық денсаулық паспортымен қамтамасыз етілген. Паспорттар пациенттерді электрондық форматта бақылау және емдеу барысын қадағалауға мүмкіндік береді.
Еске сала кетсек, аталмыш қор жеке байланыс орталығын іске қосты. Бұдан былай тұрғындар сақтандыру мәселелеріне қатысты сауалдарын 1406 нөміріне жолдай алады.