Шымкент қаласында «Нәтижелі жұмыспен қамту және жаппай кәсіпкерлікті дамытудың 2017-2021 жылдарға арналған «Еңбек» бағдарламасы» тиянақты жүзеге асырылып келеді.
Бағдарламаға қатысушының бірі 25 жастағы шымкенттік Рүстем Тойчиев өткен жылы кәсіпкерлік мектебінде «шаштараз» мамандығы бойынша білім алды. Сертификатқа қол жеткізген ол өзінің бала күнгі арманымен осы істі дамыту үшін мемлекеттік грантқа құжат тапсырған. «Менің ата-бабам да, әкем де, бауырларым да барлығы шаштараз кәсібін меңгерген. Атакәсібіміз болған істі қолға алғаныма 13 жыл болды. 7-сыныптан бастап ағаларымның жанында жүріп тәжірибе жинадым. Есейе келе осы саламен түпкілікті айналысып келемін. Алайда мүмкіндігімді жеке кәсіп ретінде ашып, пайдалана алмай жүргендіктен, әрі шаштараздықтың техникаларын толық меңгеру үшін білім алуды жөн санадым. Сертификат ала салысымен мемлекеттік грантқа құжат тапсырдым. Шүкір, мемлекеттің қолдауымен қайтарымсыз 252 мың 500 теңге ұтып алдым. Оған шаштаразға қажетті біраз құрал-жабдық сатып алдым», – дейді Рүстем бізбен әңгімесінде.
Бүгінде ол Шымкент қаласындағы орталықта орналасқан барбершопта жұмыс істейді. Мұнда әр шаштараз өзінің құрал-жабдығымен келуі тиіс деген талап қойылған. Тапқан табысының 50 пайызы шаштараз иесіне төленеді. Рүстемнің ендігі арманы – жеке шаштараз ашу. Барбершопта әбден шыңдалып, тәжірибеден өткен нағыз маманның жұмыс істей алатыны белгілі. Сондықтан мұнда көбіне қонақтар, белгілі, танымал азаматтар, сонымен бірге клиенттер келеді. Мұндағы мамандардың қызметақысы да қымбат.
Рүстем мемлекеттің жастарға жасап жатқан қолдауларына ризашылығын білдіреді. Алайда өз ісін дөңгелету үшін әлі де қолының қысқалығын, жеңілдетілген несиеге қол жеткізе алмай жүргенін жеткізді. Себебі, ондай несиеге қол жеткізу үшін кепілге қоятын баспанаң немесе тұрақты жалақысы бар екі кепілгер қажет. Ал 3 баласымен пәтер жалдап тұратын ол бұл талаптарды орындай алмайды.
«Әлі ешкім қолға алмаған бизнес-жоспар түзіп қойғанмын. Осы саланың басы-қасында 13 жылдан бері жүргендіктен табыстың қалай келетінін білемін. Жеңілдетілген несиеге қол жеткізсем, Құдай қаласа 2 жылда-ақ қайтарар едім» дейді Рүстем Бахадырұлы.
Ал мемлекеттік бағдарламаның тағы бір қатысушысы Айнұр Полатай Шымкент қаласындағы ОҚМПИ-дің «әлеуметтік педагогика және өзін-өзі тану» мамандығын өткен жылы тамамдапты. Айнұр Абдықасымқызы Шымкент қаласы әкімдігінің халықты жұмыспен қамту орталығы арқылы осында «Жастар практикасы» бағдарламасымен 6 ай жұмыс істеген. Мерзімі біткен соң осында тұрақты жұмысқа қалған. Бүгінде «іс қағаздар жүргізушісі» болып жұмысқа орналасқан жас маман мемлекеттің жастарға жасап отырған бұл мүмкіндігіне ерекше ризашылығын білдірді. «Елбасымыз биылғы жылды «Жастар жылы» деп жариялады. Жастарға көптеген мүмкіндіктер қарастырылуда. Егер осы бағдарлама болмағанда әлі жұмыс таппай жүрер ме едім? Оқу орнын енді бітірген маманды қызметке кім қабылдай қойсын? 6 ай бойы мемлекет есебінен жалақы ала жүріп, осында шыңдалдым, тәжірибе жинадым. Басшылық жұмыс істей алатыныма әбден көз жеткізген соң тұрақты жұмысқа қабылдады», – дейді Айнұр.
Шымкент қаласы әкімдігінің халықты жұмыспен қамту орталығының директоры міндетін уақытша атқарушы Шағдат Әсет қалада аталған бағдарламаға биыл 30 031 азамат қатысуы қажеттігін айтады. Бүгінде оның 20 105-і жұмыспен қамтылып отыр. «Бағдарламаның бірінші бағыты – кәсіби білім беру және кәсіптік оқыту бойынша қысқамерзімді қайта даярлау мен кәсіби оқуға 5000 адамды жіберу жоспарланса, оның 3227-і білім алды. Ал екінші бағытындағы жаппай кәсіпкерлікті дамыту бойынша 75 жоба несиелендіруі тиіс болса, қазір оның 42-і орындалды. Сонымен қатар 4502 азаматқа жаңа бизнес-идеяларын жүзеге асыру үшін грант қаралып, 67-і қазіргі таңда тиісті қайтарымсыз қаржыға қол жеткізді. Жаңа жобаларды жүзеге асыруда», – дейді Шағдат Әсетұлы.
Бағдарламаның үшінші бағыты – халықты жұмыспен қамтуға жәрдемдесу. Бұл тұрғыда қалалық халықты жұмыспен қамту орталығы тарапынан бүгінде 422 адам әлеуметтік жұмыс орындарына тартылса, 2708 жас жастар практикасы бағдарламасымен жұмысқа жіберілген. 2236 жұмыссыз ақылы қоғамдық жұмыстарға тартылуда. «Жастар – ел тірегі» жалпыұлттық жобасы аясында қазіргі таңда 1295 жас орталық тарапынан оқуға жолдама алыпты. Сондай-ақ бағдарлама аясында 485 мүмкіндігі шектеулі жан жұмыспен қамтыл-
ған.
Назгүл НАЗАРБЕК,
Шымкент қаласы