Атырауда Nur Otan партиясы, «Айтыс ақындары мен жыршы-термешілердің халықаралық одағы» және «Қазақстан» республикалық телерадиокорпорациясы арасындағы айтыс өнерін дамыту және насихаттау бойынша өзара ынтымақтастық туралы меморандумға қол қою рәсімі өтті. Маңызды құжаттағы міндеттемелердің іс жүзінде орындалуы да Атыраудан бастау алды десек болады. Атырауда поэзия падишасы Фариза Оңғарсынқызына арналған «Жыр жұлдызы Фариза» атты республикалық айтыс өз мәресіне жетті.
Nur Otan партиясы мен Атырау облысы әкімдігінің қолдауымен ұйымдастырылып отырған айтысқа еліміздің барлық өңірінен 22 ақын келді. Екі күн бойы атыраулықтар мен қала қонақтарына өрелі ой мен әсем сөзден шашу шашқан ақындардың ішінде оза шапқандары жүлделі орынға ие болды.
Ғұмырын жырмен жырлаған ұлы ақын Фариза Оңғарсынқызының 80 жылдығына арналған аламан айтысқа халық көп жиналды. Алғашқы күні 22 ақынның арасынан орақ тілді айтыскер Жансая Мусинаны іздеген тыңдармандар болды.
Дүбірлі айтыстың қорытындысында сөз алған аймақ басшысы Н.Ноғаев:
– Елбасымыз, Nur Otan партиясының Төрағасы Н.Назарбаев жуырда өткен партиямыздың саяси кеңесінде елдікті сақтауға дәстүріміз, мәдениетіміз, ұрпақтар сабақтастығы, ерліктің жалғасы керек деген болатын. Соны орындау бағытында партиялық тапсырма берген болатын. Елбасының тапсырмасын орындау мақсатында партия Төрағасының бірінші орынбасары Б.Байбек мырза осы іске құлшына кірісіп, ата дәстүріміз айтысты өткізудің бастамашысы болып, барлық жағдайды жасап отыр. Еліміздің елдігін дәріптейтін, мәдени құндылықтарды жоғалтпауға ықпал ететін шаралар үнемі ұйымдастырылады, – деген аймақ басшысы айтыс өнерін дамытуға қатысты барлық қолдауды жасайтынын айтып, поэзия падишасының өлең өміріне, адамгершілік қасиетіне тоқталып өтті. Бас жүлдеге ие болған батысқазақстандық ақын Талғат Мықиға 2 млн теңгенің сертификатын аймақ басшысы Н.Ноғаев табыс етті.
Өр ақынды жырына қосқан ақындардан оза шапқан атыраулық жүйрік Шалқарбай Ізбасаров жүлде қоры 1 500 000 болатын жүлдені қанжығасына байлады.
Фариза Оңғарсынованың 80 жылдық мерейтойына арналған мәдени шаралардың аясында өткен айтыстың да өзгешелігі тыңдарман жадында ұзақ сақталары анық. Өйткені Атырауда өткен айтыс «Қазақстан» ұлттық арнасы арқылы эфирден беріліп, республика жұртшылығы назарына ұсынылады. Бұл мүмкіндік Nur Otan партиясы, «Айтыс ақындары мен жыршы-термешілердің халықаралық одағы» басқармасы және «Қазақстан» республикалық телерадиокорпорациясы арасында үшжақты келісім негізінде болып отырғаны қуантады.
– Тәуелсіздік алғалы Nur Otan партиясы Төрағасы, Елбасы Нұрсұлтан Назарбаев халық өнеріне қолдау көрсетіп келеді. Халықтың атамұра өнері айтысты қолдау жөнінде нақты тапсырмалар берілді. Халықтың өнерін өзіңе қызмет еттіру үшін жоспарлар құрылып жатыр. Анығын айтсақ, жыл соңына дейін Nur Otan партиясының толық қаржыландырылуымен және қолдауымен бес республикалық және халықаралық айтыс өтеді. Айтыста елдегі соңғы өзгерістер, Президент Қ.Тоқаевтың халыққа Жолдауынан туындайтын жаңа міндеттер ақындар айтысына арқау болмақшы. Мүмкін алдағы барлық айтыстардың өзекті тақырыбы халықтың әлеуметтік жағдайының жақсаруы болып қалар деген ойдамыз. Көшбасшы партияның қолдауымен өтетін айтыстың ұлы ақын Фаризаға арналып өтуі жақсылықтың жаршысындай болып отыр,– деді Жүрсін Ерман.
Nur Otan партиясының хатшысы Ғабидолла Оспанқұловтың айтуынша, Елбасының «Рухани жаңғыру» бағдарламалық мақаласы аясында ұлттық құндылықтарды насихаттауға арналған айтулы іс-шаралар өтуде. Соның бірі – қазақпен бірге ғасырлар бойы жасап келе жатқан айтыс өнері.
– Ұлтымыздың айтулы өнері талантты айтыскерлердің халыққа танылуына себепкер болды. Бүгінгі таңда айтыс өнерінің дамуын Nur Otan партиясы өз қолдауына алып отыр. Мемлекет басшысы Қ.Тоқаев мәдениетіміздің, рухани құндылықтарымыздың дамуына ден қойып отыр. Бұл мәселелер «Рухани жаңғыру» бағдарламасы аясында жалғасын таба беретін болады. Бүгін біз үшжақты меморандумға қол қойдық. Әр тараптың өзіндік жауапкершілігі бар. Біз оны жауапкершілікпен атқаруды міндетімізге алып отырмыз. Көрнекті қайраткер ақын Фариза Оңғарсынқызының 80 жылдығына арналған айтыс өз деңгейінде өтті. Ол айтыс Қарағандыда өтетін С. Сейфуллиннің 125 жылдығына орай өткізілетін халықаралық айтысқа ұласады. Бұдан басқа «Отан отбасынан басталады» атты отбасылар айтысы, «Береке бірлігіңде, Елім» атты ақындар айтысы және «Алтын домбыра» жылдық қорытынды айтысы өтеді, – деді Nur Otan партиясының хатшысы Ғабидолла Оспанқұлов.
Атырау облысы