Арыс қаласындағы жарылыс кезінде әскери борышын орындауда ерлік көрсеткен әскерилерді құрметтеу жиыны өтті. Салтанатты шараға Қорғаныс министрі мен жергілікті билік өкілдері, әскерилер қатысты.
Жиынға келгендер қаза тапқан әскери қызметшілерді бір минут үнсіздікпен еске алып, 44 859 Арыс әскери бөлімінің жеке құрамы жауынгерлік жолдастарын еске алу үшін салтанатты шерумен жүріп өтті.
Шарада сөз сөйлеген Қорғаныс министрі Нұрлан Ермекбаев әскери қызметшілердің қызметі мен өмірі белгілі тәртіппен қауіп-қатермен байланысты болатынын атап өтті.
– Оқ-дәрілер арсеналында қызмет етіп жатқан сарбаздар мен офицерлер өздерінің ел алдындағы міндетін абыроймен атқарып жүрді. Аға сержант Бауыржан Әлімбеков пен сержант Әбдіқұл Ахметов көзсіз ерлік танытып, қызмет орнында ақтық демі қалғанша өртке қарсы күресіп, әскери борышын орындау кезінде қаза тапты. Нағыз батырлар қатарынан көрініп сол кезде болып жатқан жаңа жарылыс кезіне қарамастан, өртті ауыздықтау сәтінде қайсарлық танытқан әскери қызметшілерімізді ерекше атап өткім келеді. Олар танытқан ержүректіктің, табандылықтың арқасында басқа адам шығындары болмады. Қарулы күштердің өрт сөндірушілері, өзге де қызметшілер қауіпке қарамастан, оқиғаның алғашқы сәтінен бастап осы күнге дейін бөлімшедегі қоймаларда жарылғыш заттар мен қару-жарақтарды көшіруге атсалысып жатыр. Еліміздің нағыз патриот ұлдарын тәрбиелеген ата-аналарға ерекше алғыс білдіремін. Әскери қызметшілер ардақты әке, өнегелі ұл ретінде жауапты сәтте жанқиярлықпен ерлік жасады. Олар өскелең ұрпақ үшін үлгі-өнеге болды. Марқұмдардың жарқын бейнесі есімізде мәңгі сақталады, – деді Қорғаныс министрі.
Қазақстан Президенті – Қарулы күштердің Бас қолбасшысының Жарлығымен 44 859 әскери бөлімі оқ-дәрілер бөлімінің бөлімше командирі, аға сержант марқұм Бауыржан Әлімбеков пен оқ-дәрілерге техникалық қызмет көрсету бөлімшесінің командирі, взвод сержанты марқұм Әбдіқұл Ахметовтің қызметтік борышы кезінде көрсеткен ерлігі мен жанқиярлығы үшін ІІ дәрежелі «Айбын» ордендерімен марапатталғанын жеткізді. Мемлекеттік наградалар марқұм сарбаздардың аналарына табысталды.
Түркістан облысы әкімінің бірінші орынбасары Қосман Айтмұхаметов бұл оқиғаның қазақ елінің қабырғасын қайыстырып кеткенін атап өтті.
– Сіздер ержүрек, намысшыл, қайсар мінезді сарбаздарды өсірдіңіздер. Оның нақты көрінісі арыстай екі азаматымыз апат орын алған күні қызметтік борышын өтеу кезінде ерлікпен қаза тапты. Бұл – бәріміз үшін сынақ. Олардың ерлікке толы әрекеттері – жас ұрпаққа, кейінгі толқынға үлгі. Халқымызда «ер – елінің қорғаны» деген сөз бар. Бар ғұмырын Отанын қорғауға арнаған әскери қызметкерлерге алғыс білдіремін, – деді Қосман Қайыртайұлы.
Жиын соңында Қорғаныс министрі қаза болған жауынгерлердің отбасымен кездесіп, басу айтты. Марқұмдардың артында қалған балаларына қамқор болатынын жеткізді.
Назгүл НАЗАРБЕК,
Шымкент қаласы