Алматыда мамандандырылған Халыққа қызмет көрсету орталығындағы кезек үшін басшыларға қатаң сөгіс жарияланды, - деп хабарлайды"Азаматтарға арналған үкімет" мемлекеттік корпорациясының баспасөз қызметі.
"Азаматтарға арналған үкімет" мемлекеттік корпорациясы бұл факті бойынша өз міндетін тиісті деңгейде атқармағаны және мемлекеттік қызмет көрсетудің стандартын бұзғаны үшін Алматы қаласы бойынша филиал басшылығы қатаң сөгіс түрінде тәртіптік жазаға тартылатынын хабарлайды. Яғни филиал директорына, фронт-офистерді үйлестіру басқармасының басшысына және №1 мамандандырылған бөлімінің басшысына қатаң сөгіс жарияланды", - делінген хабарламада.
Сондай-ақ, 30-31 тамызда Алматыдағы мамандандырылған ХҚКО Армениядан әкелінген автокөлікті тіркейтінін, жүргізуші куәлігін беру қызметін көрсетеді. Себебі, бұл қызмет түрлеріне сұраныс жоғары екен.
Еске салайық, осыған дейін әлеуметтік желіде Алматыдағы мамандандырылған ХҚКО-ның алдындағы ұзын-сонар кезектің фотосы мен видеосы тараған еді. Видеодан кезекте тұрған адамдардың арақашықтықты сақтамағанын, кейбірінің маска тақпағанын көруге болады.
