Саясаткер Ермұхамед Ертісбаев «Азаттық рухы» ақпараттық порталының Azat alań жобасына сұхбат берді.
Azat alań жобасына келіп ашық пікір айтқан саясаткер 25 минут ішінде бірнеше сауалға жауап берді. Жүргізуші Ардақ Сейітқазиннің алғашқы заңсыз митингілерге қатысты сұрағына Е.Ертісбаев Конституцияда азаматтардың бейбіт митингіге шығуына құқық берілгенін, кез келген азамат көшеге шығып, ұрандатып, өз пікірін айтуына құқы барын айтты. Оның айтуынша, әлемнің барлық мемлекетінде митинг туралы ұғым құқық нормалармен бекітілген, біздің елдің заңында да ережесі анық жазылғанын, бірақ митинг кезінде полиция шерушілермен бірге жүру қажет екенін айтты.
«Тіпті, рұқсат етілген митинг болса да полиция қызметкерлері қабаттаса жүруі керек. Мысалы, бәріңізге белгілі Парижде болған оқиғаларды алайықшы, «сары желетке» кигендердің шеруі кезінде қалада тонау, ұрлық көп орын алды. Халықтың шеруде жүргенін пайдаланып, біреулер тонаумен айналысты. Сол кезде полиция олардың жолын кесті»,–деді ол.
«Полицияның жалақысын көбейтсек...»
Ертісбаев сұхбат барысында еліміздің полициясының айлығын көтеру туралы да ұсыныс айтты. «АҚШ-та полицейлердің жылдық табысы 30-40 мың доллар, яғни айына, кем дегенде, 2 500 доллар табыс табады және қосымша әлеуметтік пакет қарастырылған. Біздің құқық қорғаушыларға да сондай жағдай жасасақ, барлығы өзгерер еді. Мысалы, Грузияда айлықты көтеріп, жемқорлықты жойды. Қазір грузиндердің полицияға деген сенімі жоғары, шіркеуден кейін азаматтар полицияға сенеді», – деді саясаткер.
«Әбіләзовке керегі – құрбандық»
Ермұхамед Ертісбаев өзінің бұрынғы банкирмен дебаты туралы айтып, Мұхтар Әбіләзовпен пікірталаста оны жеңемін деп мақсат қоймағанын жеткізді. Саясаткердің айтуынша, екеуінің арасындағы пікір алмасу дебат деп айтуға да келмейтінін, дебаттың өз мәдениеті болатынын, ондай жоғары деңгейдегі дебаттар АҚШ, Еуропа мемлекеттеріндегідей саяси мәдениет тұрғысында жасалатынын тілге тиек етті. «Мұхтар Әбіләзовтің интернет арқылы тыныш жатқан мемлекетке үлкен бүлік жасап отырғанына, арандатып жатқанына елдің, әлемнің көзін жеткізуді мақсат еттім. Ол тіпті интернет арқылы өзін Қазақстанның Премьер-министрі сезініп кеткендей. Ол өзінің жеке басындағы өшпенділігін туған халқына таңып, халық арқылы дегеніне жеткісі келеді. Оған керегі – құрбандық»,– деді Ертісбаев.
Сондай-ақ Е.Ертісбаев сұхбат барысында кезінде Мұхтар Әбіләзовтің Қырғызстанның президенті Атамбаевқа «Қазақстанға су жібермей қой, сонда оңтүстіктегі халық сусыз қалған соң, елде тұрақсыздық болады» деп кеңес бергенін де айтып өткен. «Мұхтар өзі сол өңірдің тумасы. Мұндай сөзді қалай дәті барып айтты. Осыдан кейін Әбіләзовке қалай сенуге болады?» – дейді саясаткер.
«Жастар партия құрып, саясатқа араласамын десе, қолдаймын»
Ертісбаев өз сөзінде елде саяси белсенді жастар өсіп келе жатқанынан хабардар екенін тілге тиек еткен. Егер саяси тұрғыда белсенді жастардың партия құру ойлары болса қолдайтынын айтқан саясаткер, жастарға қарата «40 мың адам қол жинап, оны тіркету біраз жұмыс. Мен «Оян, Қазақстан!» қозғалысындағы жастарға елімізде тіркелген 7 партияның кез келгеніне барып жұмыс істеңіздер деймін. Жаңадан партия құрғанша, неге дайын тұрған саяси ұйымдардың жұмысын жетілдірмеске?» – деп кеңес берген.
Сұхбат соңында ел азаматтарына Мұхтар Әбіләзовтің интернеттегі айдап салма сөзіне еріп, заңсыз митингіге шығып, заңға тартылып қалмауын сұраған Ермұхамед Ертісбаев халықты елдегі бірлікті сақтауға шақырды.
«Бейбітшілік – Қазақстанның бренді». Әбіләзов арқылы біреулер сол бірлікті құртқысы келеді. Біз еліміздің екінші Президентіне көмектесіп, мемлекетіміздің іргесін одан ары бекітуіміз қажет», – деді саясаткер сұхбат соңында.