«Атамекен» Ұлттық кәсіпкерлер палатасының Шымкент қаласындағы филиалында бизнестің негіздерін оқып, сертификатқа қол жеткізген Мадинаның жұбайы Талғат Сералыұлы кондитерлік өнімдер пісіріп, сату бойынша бизнес жоба ұсынып, 505 мың теңге көлемінде грант ұтып алады. Оған кондитерлік өнімдерге қажетті құрылғылар, форма және жуырда ғана ашқан дүкеніне мұздатқыш, газ плита мен қысқа толқынды пеш, электр шәйнегін сатып алыпты.
Отағасы әскери бөлімшеде әскери қызметкер, өзі қалалық әкімдіктің жер комитетінде сәулетші болып жұмыс істеген жас отбасының басына түскен ауыртпашылық, яғни перзенттерінің күтімді қажет етуінің салдарынан, екеуі де тұрақты жалақысы бар жұмыстан қол үзіп қалған. «Бір күн де үйде бос отырған емеспін. Өмірге бала әкеле салысымен бесік тербетіп жүріп, тандырға нан жауып саттым. Жолдасым самса, пирожки, пигоди пісіріп береді. Мен оны айналамыздағы мекемелерге апарып беретінмін. Жақын күндерге дейін осы кәсіпті нәсіп еттік. Тіпті, үлкен көшенің қиылысында көже сатып, ақша тауып балалардың еміне, киіміне жұмсап, пәтерақымызды төлеп жүрдік» дейді көпбалалы ана бізбен әңгімесінде. Қазір үйіне жақын маңдағы аялдаманың жанына кішігірім дүкен салып алыпты. Шымкент қалалық әкімдігінің, Абай аудандық әкімдігінің басшылығына, тиісті сала басшылары мен мамандарына шексіз ризалығын білдірді: «Әкімшілік қызметкерлері менің кәсіп ашамын деген ниетіме риза болды. Дүкен салуға деген әрекетімді қолдап, барлығы да қол ұшын созды» дейді ол. Бір қарыс жері алтынға пара-пар, сонымен бірге қаланың қақ ортасындағы аялдаманың жанынан бір тиынсыз жер алу дегеніміз – үлкен жетістік. Жерді тегін алып қана қоймай, жомарт жандардың арқасында осы дүкенді тұрғызып алады. Ал іргетасы мемлекеттен адам басына 21 мың теңгеден бөлінген әлеуметтік көмек ақшаның арқасында қаланған. Ал аядай ғана дүкенге қажетті заттар жоғарыда атап өткен қайтарымсыз грантпен алынды. Осылайша, бұл отбасыға келген биылғы жақсы жаңалықтар жылдар бойғы адал еңбектің қайтарымы болса керек.
«Шүкір, дүкенді ашқан 6 күннің ішінде табыс жаман емес. Түнгі сағат 23.00-ге дейін жұмыс істеймін. Жақын маңда «Қажымұқан» атындағы орталық стадион, басқа да түрлі спорт мектептері мен мектеп, халыққа қызмет көрсету орталығы және автокөлік жуу орталығы бар. Менің негізгі клиенттерім – оқушылар. Басқа дүкендерден «арзан екен» деп балалар келіп тұрады. Соған мәзбін. Жолдасым түрлі кондитерлік өнімдер пісіріп, жеткізіп тұрады. Одан бөлек, рұқсат етілген акциздік тауарлар сатамын» дейді Мадина. Балаларының үлкені мектепке барса, екеуін мұғалімдер үйге келіп оқытады екен. Осыдан 5 жыл бұрын үй кезегіне тұрған. Қазір 2 499-ы кезекте тұр. Бұйырса, 1-2 жылда баспаналы болып қалармыз деген үмітте.
Біз де болашағынан үлкен үміт күтіп отырған отбасыға сәттілік тілеп қайттық.