Жетісуда жаңалық көп және оның барлығы заман ағымына сай жүзеге асырылып жатқан жақсы істерден тұрады. Күні кеше Талдықорғанда Алматы облысындағы алғашқы Jetysý Hub IT паркі өз жұмысын бастады.
Соңғы жылдары салынып, алға жылжыған жылдармен бірге қанатын кеңге жайып, өрістеп-өркендеп келе жатқан жетінші шағынаудандағы 16 қабатты үйдің 360 шаршы метрінде қоныстанған технопарк фаблаб, воркшоп шеберханасы, оқу сыныбы мен кітапхана және тағы басқалар орналасқан кең әрі жарық кабинеттерден тұрады.
Замана көшінен қалмауды, ақпараттық ғасырдың ағынына ілесуді ойлаған жетісулықтарды жақсы жаңалықпен құттықтауға келген Алматы облысының әкімі Амандық Баталов жаңа жобаның облыс үшін аса маңызды екендігіне, өңірді цифрландырудың жеделдеуіне жол ашатындығына айрықша тоқталды.
– Дәл осындай технопаркті Қазан қаласынан көргенде, бізде де осындай жобаны жүзеге асыру қажет деген ойға келген болатынмын. Жарқын бастаманы жүзеге асыратын дарынды жастар елімізде де жетіп артылады екен. Біз өз тарапымыздан оларға орын тауып беріп, тиісінше қолдау жасадық. Олар өз кезегінде қысқа ғана мерзімде осынау ерекше технопаркті жасады. Соның арқасында жастарымыздың өз идеяларын іске асыруына тамаша мүмкіндік туды. Өйткені бұрындары олардың дәл осы технопаркте тұрған заманымыздың соңғы үлгідегі жабдықтарына қолдары жете бермейтін. Жаңа технологиялардың арқасында түрлі салада керемет жетістіктерді бағындыра аламыз. Әлем бір орында тұрмайды, үнемі қозғалыста, өркендеуде болады. Біз де сол даму қарқынынан қалмауға тиістіміз. Облыста цифрландыру бүгінгі күн сұранысына сай жүргізілуде. Тек Талдықорған қаласының өзінде ғана қазіргі кезде көшелерге бақылау жүргізетін 900-ден астам бейнебақылау камерасы орнатылған. Осыдан он шақты жыл бұрын, бар-жоғы жиырма камера ғана жұмыс істеген.
Алдағы кезде цифрландыру бағытындағы жұмыстарды жалғастырамыз. Таяу жылдары Талдықорған Smart city қалаға айналады. Сонымен бірге облыс орталығында интернет колледж салмақпыз. Бұлардың барлығы болашақ иелері – бүгінгі балалар мен жастар үшін. Пайдаланыңыздар, өздеріңізді жетілдіріңіздер, жасаған жобаларыңызбен әлемді бағындырыңыздар!
Jetysý Hub – Алматы облысындағы IT индустрияның орталығына, қозғаушы күшіне айналатындығына сенемін, – деді облыс басшысы өзінің тілегінде.
Жаңалық жастарды қатты қуантты. Робототехника, воркшоп, 3D үлгілеу мен кванториум кабинеттерін бірден жаулап алған оқушылар мен жастардың айтуынша, осында жүргендеріне бірнеше күн болғандарымен, қызығушылықтары артпаса, кемімеген.
Фаблаб кабинетінде қонақтардың назарына энергия үнемдеуші шамдар жобасы ұсынылса, оқу сыныбында тұрғындарды кәсіпкерлік негіздеріне, заңдық және бухгалтерлік сауаттылыққа оқытатын бизнес акселерат жобасының жұмысы таныстырылды. Осында өз білімін жетілдіріп, ізденісін жүзеге асырған оқушылар мен студенттер өз жобаларын түрлі конференцияларда, қалалық, облыстық және республикалық деңгейдегі жарыстарда көрсетіп, қорғай алады. Басты назар экологиялық және әлеуметтік мәселелерге аударылып, бірінші кезекте қоғамға пайда әкелетін жобалар жасауға көңіл бөлінеді. Салтанатты ашылу шарасы кезінде Нұр-Сұлтандағы «Астана-Хаб» стартаптар технологиялық паркі мен Талдықорғандағы Jetysý Hub IT паркі арасында ынтымақтастық жөніндегі меморандумға қол қойылды.
Болат АБАҒАН,
Алматы облысы