Кез келген ел үшін ата-бабалар дәстүрі – тарихтың мызғымас бөлігі. Сондықтан оларды әрбір азамат есте сақтап, қастерлеуі тиіс. Ата-бабалардан қалған тамсанар дәстүрлер қазақ халқында өте көп, бірақ қазіргі заман жағдайында олардың кейбіреуін жастар дұрыс түсіне бермейді.
Жуырда Қордай аудандық сотының үкімімен Түркістан облысының төрт тұрғыны қыз ұрлағаны үшін 7 жылға бас бостандығынан айырылды және автокөлік қылмыс құралы ретінде тәркіленіп, мемлекет кірісіне алынды.
Оқиға өткен жылдың күзінде жігіттің Жамбыл облысы Қордай ауданында тұратын қызбен танысуынан басталған екен. Жастардың әлеуметтік желі арқылы қысқа қарым-қатынасы, жігітте қызды алып қашу ойы пайда болуына әкеледі.
Ұзақ ойланбастан жігіт үйлену мақсатында, өзінің үш танысымен келісіп, Қордай ауданына автокөлікпен келді. Мұнда келген соң, ұялы телефонға қоңырау шалып, қызға кездесуді ұсынды, бірақ ол басында бас тартты. Алып қашу ойынан танбаған жігіттер қызды үй жағында күтіп, оны көшеде қарсы алды. Қыздың қарсылық көрсетіп бас тартуына қарамастан, олар оны көлікке күштеп салып, Түркістан облысына жол тартады. Алайда полиция қызметкерлері «барымташыларды» Тараз қаласынан шыға берісте ұстайды.
«Егер бұрын қалыңдықтың ұрлануы қазақ дәстүрінде болса, қазіргі заман талабы бойынша ол қылмыс болып есептеледі» дейді құзырлы сала қызметкерлері.
Осыған байланысты облыс прокуратурасы жігіттердің қызды алып қашуы сияқты ойланбай істеген іс-әрекеттері үшін 15 жылға дейін бас бостандығынан айыру түріндегі жазаға тартылып, ауыр зардаптарға ұшырауы мүмкін екендігін түсіндіреді. Сондай-ақ ұрланған адамды өз еркімен босатқан адам, егер оның әрекеттерінде өзге қылмыс құрамы болмаса, қылмыстық жауаптылықтан босатылады.
Жамбыл облысы