Бүгінгі таңда аймақтарда жария пікірсайыстар ұйымдастырылып жатыр. Праймеризге қатысушылар аталған науқанға не себепті қатысып жатқанын, болашақта қандай мәселені көтеріп, оң шешімін табуға себепші болатыны жайында айтып, халықпен кездесулер өткізуде.
Көпшілігінің мақсаты партияның атынан алдағы сайлауда депутаттық мандатты жеңіп алып, сол арқылы атқарушы билік пен халық арасындағы қарым-қатынасты, байланысты арттыру екені түсінікті. Өйткені мәслихаттар азаматтардың өз ойын ашық айта алатын, мәселелер шешілетін нағыз диалог алаңына айналуы тиіс. Дегенмен әр праймеризге қатысушының бұдан өзге де өз тарапынан көтеріп отырған өзекті проблемалар бар. Ендеше біз солардың бірқатарына тоқталайық.
Атап айтар болсақ, Ақтөбе облысындағы праймеризге қатысушылардың бірі өңірде мүмкіндігі шектеулі балаларды емдеуге арналған медициналық орталық салуды жоспарлап отыр. Сондай-ақ өнер мектептерін салу мәселесі негізгі күн тәртібінде тұр.
Ал Шығыс Қазақстан облысы Семей қаласындағы облыстық онкологиялық диспансердің рентгенологиялық орталығын және сапалы медициналық көмекке тең қолжетімділікті қамтамасыз ету мақсатында 200 төсектік балалар қалалық ауруханасын салу мәселесін Шығыс Қазақстан өңіріндегі праймеризге қатысушы азаматтар көтеруде. Қызылорда облысынан мүмкіндігі шектеулі балаларға арналған оңалту орталығын ашуды жоспарлап отырғандар да бар.
Праймеризге қатысушылардың арасында білім саласындағы қордаланған мәселелерді шешуге, экологияны жақсартуға күш салғысы келетіндердің көптігі қуантады. Сондай-ақ жол сапасын жақсартуға жаңа технологияларды пайдалану, аулаларды абаттандыру мақсатында тың тәжірибелерімен бөліскісі келетіндер де жоқ емес.
Бұдан өзге, кәсіпкерлерді қолдау, жастар арасындағы жұмыссыздық, сыбайлас жемқорлықпен күрес, мектеп оқушыларын тегін интернетпен қамту және кадр мәселесі сияқты тақырыптарда үміткерлер өз ойын ашық түрде ортаға салуда.
Кейбір ауыл тұрғындары үшін ауыл шаруашылығын дамыту мен туризм саласына ерекше назар аудару мәселесі күн тәртібінде тұр. Сондай-ақ «Дипломмен – ауылға!» бағдарламасы аясында жас мамандарды ауылдық жерлерге тарту және қаланы абаттандыру мен қала ішіндегі жолдарды күрделі жөндеуден өткізу шешімін күттірмес мәселеге айналғалы қашан.
Шалғай елді мекендерде ауыл ішіндегі жолдардың жайы көңіл көншітпейді. Зейнеткерлердің пошта қызметі сапасына көңілі толмаса, кей тұрғындар үшін мал жайылымы жоқтың қасы. Осы және өзге де маңызды сұрақтардың бәрі праймеризге қатысушылардың сайлауалды бағдарламасында көрініс тапқан.
Негізінен, айтылған пікірлердің дені облыстың әлеуметтік-экономикалық дамуына қатысты екені белгілі. Кандидаттар жас отбасылардың баспана сатып алуына несие ставкасын төмендету және мүмкіндігі шектеулі азаматтарға барынша қолдау көрсетуді де назардан тыс қалдырмауда. Қорыта айтқанда, өзін-өзі ұсынып жатқан азаматтардың басты мақсаты – ел азаматтарының тұрмыс сапасын жақсарту. Олардың сөзінің іс жүзіндегі көрінісіне куә болар күн де алыс емес.
