Мемлекеттік қызметтің барлық саласы халықпен тығыз жұмыс істейді, қарапайым жұрттың мұң-мұқтажын үнемі назарында ұстайды деуге әлі ертерек сияқты. Әйтеуір, басқаның бәрінен түңіліп, ақтық арқасүйері ретінде Nur Otan партиясынан үміттеніп, қоғамдық қабылдауға жазылып, қабылдаудан соң жүздеріне күлкі оралып, қуана қайтатындар қатары баршылық. Соған сай бүгінде партияға деген халық сенімі де артып келеді.
Ең бастысы, заңды басшылыққа ала отырып, кейбір жағдайларды түбегейлі шешпесе де, жақсы күндерге деген тәтті үмітті оятып, қолдан келген жәрдемді сөзбұйдаға салмай жасау екенін аңғарасың осындайда.
Талдықорған қаласының тұрғыны, үш баланың анасы Әйгерім Нұрпейісова отбасының кірісі, отағасының азын-аулақ табысы бала-шағаның күнделікті тамағы мен киім-кешегінен, керек-жарағынан аспайтынын, тұрмыстық жағдайдың тым төмендеп кетуінің кесірінен салып жатқан тұрғын үйге құрылыс материалдары жетпей қалғанын, қыстың қыраулы күндері де таяғанын айтып, қалалық партия филиалына көмектесу жөнінде өтініш білдірген еді. Еденіне төсейтін материалдың жоқтығы мен жуынатын бөлмені жабдықтай алмай отырғанын айтқан ананың отбасылық жағдайын бақылауға алып, анықтаған партиялықтар ол кісіні бірнеше күннен кейін партия филиалының қоғамдық қабылдауына шақырып, қажетті көмек көрсетті. Салынып жатқан үйінің еденіне төсеуге арналған линолеум, тазалық бөлмесінің барлық керек-жарағын түгендеп берді. Нақтырақ айтсақ, бұл көмекті Талдықорған қалалық мәслихат депутаты С.Жансеңгіров жасады. Депутат қабылдау күні алдына келген басқа да азаматтардың мәселелерінің шешілуіне септігін тигізді. Атап айтсақ, есту аппаратын алуға мұқтаж болып жүрген жалғызбасты кейуана Т.Рысбаеваға қажетті құрылғысын сатып алып берді.
Жалғызбасты аналардың арасында балдырғандарын балабақшаға орналастырғанымен, тәрбие мекемесіне тиесілі ай сайынғы төлемді уақытында төлей алма қиналып жүргендер де кездеседі. Сондай жандардың бірі – талдықорғандық екі баланың анасы Жадыра Серікқызы қалалық партия филиалына келіп, мәселесінің мән-жайын жеткізген еді. Осыдан бірнеше жыл бұрын отағасынан айырылған жалғызбасты ана балаларының ел қатарынан қалмауы жолында жанталаса жұмыс істеп жүргенімен тапқан табысын жеткізе алмай қиналатын көрінеді. Сол жетіспеушілік кесірінен балабақшаға тиесілі төлемді төлей алмай жүргенін айтып келген оны қабылдаған қалалық партия филиалы төрағасының бірінші орынбасары А.Жазықбаев қалалық білім бөлімі басшылығымен бірлесе отырып, мәселені оң шешуге ықпал жасады. Балалары үшін балабақшаға төлемді мүмкіндігіне қарай бөліп төлеуге рұқсат алып берді.
Nur Otan партиясы Қаратал аудандық филиалының қоғамдық қабылдау бөлмесінің кестесіне сәйкес Қаратал аудандық мәслихат депутаты Саят Төлеубеков азаматтарды жеке сұрақтары бойынша қабылдады.
Қабылдауға келген Үштөбе қаласының тұрғыны, жас маман Назерке Жақсылықбай жұмыс таппай жүргенін айтып, көмек сұрады. Назеркенің жағдайын мұқият зерделеп, өтінішін зейін қоя тыңдаған аудандық мәслихат депутаты оны жастар тәжірибесі арқылы аудандық партия филиалына жұмысқа орналастыруға ықпал етті.
Адамға емес қағазға сенген қазіргі заманда, құжаттармен жұмыста қателіктер кетіп, әлеуметтік көмекке мұқтаж жандар тиесілі жәрдемақыларын немесе тағы басқа да төлемдерін ала алмай қалады. Өйткені мемлекеттен төленетін әр тиынның есебі қатаң жүргізіледі және талабы да тым қатаң. Белгілі мерзімде құжаттарды толықтырып немесе жаңалап отыру қажет. Бұл мәселе әсіресе, ауылды жерлерде аса күрделі. Nur Otan партиясы Ақсу аудандық филиалы қоғамдық қабылдау бөлмесіне келген аудандағы Тарас ауылының тұрғыны Ұлжан Тлемісова көпбалалы ана ретінде алып жүрген жәрдемақысының тоқтап қалғанын айтып, оның себебін анықтап, мәселенің заң жүзінде шешілуіне ықпал етуді сұрап, шағымданды. Ананы қабылдаған аудандық партия филиалы төрағасының бірінші орынбасары К.Дәулетбекова сол жерде аудандық жұмыспен қамту және әлеуметтік бөлімдер басшысы Қ.Бекбаланов және Қарасу ауылдық округінің әкімі Т.Арғынбаевты қатыстыра отырып, өтінішті жан-жақты қарап, тексеріп, жиналған құжаттардың толық екендігін анықтады. Жалғызбасты ананың жәрдемақысы бірден оның есеп-шотына аударылды. Бұдан әлеуметтік қорғауға байланысты халықпен тікелей жұмыс істейтіндердің өз міндетіне жүрдім-бардым қарайтынын, қарапайым адамдардың мәселесіне жете мән бермейтінін аңғаруға болады.
Болат АБАҒАН,
Алматы облысы