Мәселен, елорданың іргесінде орналасқан Целиноград ауданының тұрғындарын мазалайтын негізгі мәселелер праймеризге қатысушылардың сайлауалды бағдарламаларында жарық көрді. Әр кандидат өзінің нақты шешімін ұсынса, ерейментаулық праймеризге қатысушылар ауыл шаруашылығы саласына көңіл бөлу керегін жеткізді.
Праймеризге қатысушылардың арасында білім саласындағы қордаланған мәселелерді шешуге, Қоянды, Қосшы, Талапкер ауылдарының мәселесін, үш ауысымдағы мектептердің мәселесін шешу бойынша ұсынысын айтқандар болды. Сондай-ақ жол сапасын жақсарту, таза ауызсумен қамтамасыз ету, аулаларды абаттандыру мақсатында елімізде жоқ тәжірибелерді ұсынды.
Ал көкшетаулық праймеризге қатысушылар облыс орталығындағы ТЭЦ салу мәселесін, электр қуаты бағасының қымбат екенін, таза ауызсудың жоғын айтып, оның нақты шешімдерін ортаға салды. Пікірсайыс кезінде жұмысшы мамандығына деген тапшылық жайы айтылды. Қала ішіндегі автобустарға кәсіби жүргізушілер жетіспейтінін, аула ішіндегі балалар ойын алаңына күрделі жөндеу жүргізу керегін айтты. Жалпы, Көкшетау қаласы республика бойынша электр қуатына төленетін жоғарғы тарифімен және әр пәтерде су жылытатын арнайы аристондардың орнатылғанымен ерекшеленеді. Бірнеше жылдарға созылып кеткен ТЭЦ салу мәселесі әлі де шешімін тапқан емес. Праймеризге қатысушылардың дені үгіт-насихат жұмыстары кезінде сайлаушылармен кездесіп, олардың ұсыныс-пікірлерін өз сайлауалды бағдарламасына енгізген.
Шығыс Қазақстан облысында өткен ашық пікірсайысқа қатысушылардың бірі Дархан Абулханов ауылдық жерлерде тұратын халықты таза сапалы ауызсумен толықтай қамтамасыз ету, жол мәселесі, білім саласындағы түйткілдер, Денсаулық саласындағы кезек күттірмей шешуді қажет ететін сұрақтар осының бәрін өз бағдарламамның басым бағыттары етіп алып отырғанын айтты. Тағы бір Өскемен қаласынан праймеризге қатысушы үміткер Әскерхан Хуанбай қандастарға қатысты мәселелер аз емес, азаматтық алудағы түрлі қиындықтар, баспанамен қамту, ортаға бейімдеу жұмыстарын жүргізу сынды мәселелерді алға тартты.
Атырау облысындағы Махамбет ауданында өткен праймериз қатысушыларының арасындағы пікірталасқа партияластары әлеуметтік желі арқылы сауал жолдады. Олар үміткерлерге мемлекет деңгейіндегі келелі мәселелерді емес, ауылдағы шешілмей жүрген басты проблемаларға назар аударуды сұрады. Халықты таза ауызсумен қамту, кәріз желісін жүргізу, мүмкіндігі шектеулі жандардың өз кәсібін ашу секілді мәселелер көтерілді.
Айта кетейік, дебаттар эпидемиялық жағдайды ескере отырып өткізілуде. Бөлмелерде залалсыздандырғыш заттар орнатылған. Сондай-ақ қатысушылар мен көрермендерге медициналық маска үлестіріліп, кіреберісте дене қызуы тексеріледі.
