Президент Қасым-Жомарт Тоқаев Қазақстан халқына Жолдауында 2020 жылды Еріктілер жылы деп атап өтіп, ондағы маңызды міндеттердің бірі – жастар мен студенттерді ерікті жұмысқа тарту, оларға белсенді өмірлік позицияларды сіңіру керегіне тоқталған болатын. Осыған орай, Президент Жолдауын насихаттау мақсатында Қызылордада волонтер ұстаздармен арнайы кездесу ұйымдастырылды.
Шарада алдымен қоғамдағы ұстаздар мәртебесі, жалпы, волонтер дегеніміз кім, оны қалай дамытамыз, еріктілер жылында қандай жұмыстарға басымдық беруіміз қажет деген мәселелер көтеріліп, ортақ талқыға түсті. Nur Otan партиясы облыстық филиалы төрағасының бірінші орынбасары Ақмарал Әлназарова еріктілік қағидасы жастардың белсенділігін көрсетіп, адамдарға көмек берумен ғана емес, өз бойындағы өмірлік маңызды дағдыларын дамытып, тәжірибе жинауға, әлемді жаңа қырынан көруге мүмкіндік беретін бірден-бір сала екенін айтты. Сондай-ақ волонтерлық қызметке жұмсалған уақытты, тұлғалық дамуға құйылған инвестиция деп қабылдау керегін жеткізді.
Кездесуде сөз алған «Дарын» бастауыш партия ұйымының төрағасы, Мәншүк Мәметова атындағы Қызылорда педагогикалық жоғары колледжінің директоры Бақытжан Сайлыбаев, «Қазақстандық білім және ғылым қызметкерлерінің салалық кәсіподағы» Қызылорда облыстық ұйымы төрайымы, облыстық мәслихаттағы Nur Otan партиясы депутаттық фракциясының мүшесі Райкүл Байназарова Президент Жолдауын, еліміздегі білім саласына қатысты реформаларды табысты жүзеге асыруда ұстаздар қауымына артылар жауапкершіліктің қашанда зор екенін тілге тиек етті.
Кездесуден мол тағылым алған жастар қауымы да ойларын ортаға салып, алған әсерлерімен бөлісті.
– Бұл жиында біз, облыстық білім және ғылым қызметкерлері кәсіподағы жанынан құрылған «Жастар кеңесі» мүшелері өзіміздің ашық ойларымызды айтып, еркін пікір алмастық. Волонтерлар жылында да бұған дейін атқарып жатқан жұмыстарымызды одан ары жандандырып, ел игілігіне адал қызмет ететінімізді білдірдік, – дейді қаламыздағы №235 орта мектеп директорының бағдарлы оқыту жөніндегі орынбасары Жанар Сағындықова.
Ұстаздар мерекесі қарсаңында өткен шарада жас ұстаздар партия филиалының алғысхаты және «Қазақстандық білім және ғылым қызметкерлерінің салалық кәсіподағы» Қызылорда облыстық ұйымының арнайы сыйлықтарымен марапатталды.
Әбілмансұр ЖАСАН