Бүгін Nur Otan партиясы Түркістан облыстық филиалының «Open Space» форматындағы Қоғамдық қабылдауында облыс әкімі Өмірзақ Шөкеев азаматтарды қабылдап, олардың мұң-мұқтажын тыңдады,–деп хабарлады облыс әкімінің баспасөз қызметі.
Аймақ басшысының қабылдауына келген көп балалы ана Тойлыбаева Ұлжан атаулы әлеуметтік көмек алу мәселесіне тоқталды. Сондай-ақ баспанаға қол жеткізе алмай жүргенін жеткізген азаматша көмек сұрайды.
«Біз сіздің жағдайыңызды түсініп отырмыз. Бұл мәселені шешуге тырысамыз. Алайда, сіз ең алдымен үй кезегіне тұруыңыз қажет»,– деп түсіндірді Ө.Шөкеев. Аталған азаматқа жұмыспен қамтуды үйлестіру және әлеуметтік бағдарламалар басқармасы арқылы тиісінше қолдау көрсетіледі.
Қоғамдық қабылдауға келген мұғалім М.Исрайлова ұлттық бағытта білім беретін қыздар мектебін ашуды армандайды. Батыр ана өз мақсатын жүзеге асыру жолында ғимарат сұрап келіпті.
«Сіздің идеяңыз ұнады. Қазір Түркістанда неке сарайы салынып жатыр. Осы ғимаратты барып көріп, ұнаған бөлмеден үйірме ашуыңызға болады. Мен Қыздар мектебін ашу, ұлттық бағытта тәрбие беретін үйірме ашу бойынша жан-жақты көмек көрсетемін»,– деді өңір басшысы.
Облыстық әйелдер кеңесінің төрайымы Б.Жандосова облыста республикалық «Өнеге» жобасының жұмысын жандандырып, Түркістаннан тұрмыстық зорлық-зомбылыққа ұшыраған азаматтарға арналған дағдарыс орталығын ашсақ деген идеясымен бөлісті. Әлеуметтік маңызы зор бастамаға әкім қолдау білдіретіндігін жеткізді.
Айта кетейік, Nur Otan партиясы Түркістан облыстық филиалының «Open space» форматында ашылған Қоғамдық қабылдау кеңсесіне барлық мемлекеттік орган жетекшілері, облыс әкімі, басқарма басшылары ай сайын келіп, тұрғындармен қабылдау жүргізіп жатыр.