Nur Otan партиясының Республикалық қоғамдық қабылдау кеңсесіне Премьер-министрдің бірінші орынбасары – Қаржы министрі Әлихан Смайлов келді. Вице-премьердің қабылдауына келгендердің басым бөлігі отандық бизнеске қолдау көрсетуді сұрады.
Мәселен, Шымкент қаласынан бейнебайланыс арқылы шағымын жеткізген Shymkent Temir ЖШС-ның басшысы Бегім Құдабаев Қазақстаннан қара және түсті металл сынықтарын шығаруға тыйым салуды енгізуді сұрады.
– Шымкентте металл сынықтарын өңдейтін 6 зауыт бар. Металлолом жетпейді. Көбі Өзбекстанға, Ресейге тасымалданып жатыр. Облыс басшылығы жұмыс орнын қысқартпаңдар, жалақы азайтылмасын дегеннен кейін зауытымызды әзер ұстап отырмыз. Бұлай жалғаса берсе, жұмыс орындарын қысқартуға мәжбүр боламыз, – дейді Б.Құдабаев.
Бұл мәселеге қатысты түсініктеме жасаған Индустриялық даму және өнеркәсіптік қауіпсіздік комитеті төрағасының орынбасары Бақытжан Сәпиев 2014-2017 жылдары темір сынықтарын сыртқа шығаруға тыйым салынғанымен, қазір ол алынып тасталғанын жеткізді.
– Қазақстанда жыл сайын 3-4 млн тонна темір сынықтары жиналады. Ал еліміздегі металлургия мекемелерінің өндіріске алатыны 1,8 млн тонна ғана. Яғни, темір сынықтары жеткілікті. Мәселе олардың шет елдерге ешқандай бақылаусыз кетіп жатқандығында. Әзірге бұл нарық реттелмеген. Темірді кім болса сол жинайды. Тіпті құдық қақпақтарына дейін жинап, ол тұрғындардың өміріне қауіп төндіретін жағдайлар бар. Сондықтан қазіргі таңда темір сынықтарын жинайтын компанияларды лицензиялау мәселесін қойып отырмыз, – деді комитет өкілі.
Бақытжан Сәпиевтің айтуынша, темір сынықтарының экспортына тыйым салу 2 айдан жарты жылға дейінгі мерзімге ғана енгізіледі. Сондықтан бұл тәсіл мәселені шешпейді. Оны металл сынықтарын жинаушы мекемелердің өздері де растап отыр. Ал лицензиялау қайта енгізілсе, Қазақстан бойынша металл жинаушы мекемелер саны 30-дан 50-ге дейін ғана болады. Өз кезегінде Премьер-министрдің бірінші орынбасары лицензиялауды енгізсек, бұл нарық реттелетінін әрі металл сынықтарын шетелге шығару да айтарлықтай қысқаратынын айтты.
Бұдан соң вице-премьердің қабылдауына Hill Corparation ЖШС-ның өкілі Жанту Мамашев келді. Мотор майлары мен жанар-жағармай материалдарының кең спектрін шығаратын зауыт өкілі өз өнімдерінің экспортына алаңдаулы. Себебі жақында ғана еліміздің Энергетика министрлігі жанар-жағармайдың көлеңкелі айналымын қадағалау мақсатында мұнай өнімдерінің экспортына тыйым салатын бұйрықты бекіткен. Осыған байланысты Ж.Мамашев аталған бұйрықтың мазмұнына өзгеріс енгізіп, елден шығаруға тыйым салынған мұнай өнімдерінің тізімінен Hill Corparation ЖШС өндіретін майлау материалдарын алып тастауға ықпал етуді сұрады.
Қаржы министрі Әлихан Смайлов аталған бұйрықты тоқтатуға болмайтынын, себебі ол ішкі нарыққа үлкен шығын алып келетінін айтты. Ол сонымен қатар экспортқа тыйым салмасақ, елімізде мұнай өнімдерінің тапшылығы туындап, ол жанармай бағасының шарықтауына әкеп соқтыратынын, ал бұдан тұрғындар зардап шегетінін жеткізді.
Nur Otan партиясының алаңында өткен қабылдауға бұдан өзге тағы екі азамат келді. Олардың бірі – квазимемлекеттік сектор үшін мемлекеттік сатып алулар жүргізетін онлайн сервис ұсынып отырған Mit work ЖШС-ның директоры Самат Қаскенов. Ол Қаржы министрлігінің бұйрығымен квазимемлекеттік сектордың онлайн сатып алулар бойынша операторы болып «Электрондық қаржы орталығы» АҚ-ның бекітілуіне қарсылығын білдірді.
Ал қабылдауға келген Шынықұл Өзбеков әскери тапсырма орындау барысында қаза тапқан туысының әйелі мен балалары баспанасыз жүргенін, ол аздай Қорғаныс министрлігі материалдық көмек ретінде 2016 жылдан бері пәтерді жалға алу үшін төлеген ақшасын бүгінгі таңда қайтаруды талап етіп отырғанын айтып шағымданды. Осы арызға байланысты Қорғаныс министрлігінің өкілдері «Әскери қызмет және әскери қызметшілердің мәртебесі туралы» заңға өзгерістер енгізу қарастырылып жатқанын жеткізді.
Жалпы, Nur Otan партиясының Республикалық қоғамдық қабылдау кеңсесіне өткен қабылдауда көтерілген мәселенің барлығы вице-премьердің және партияның бақылауында болады.
Клара НАҚЫП