Жыл басынан бері Ақтөбедегі партия филиалдарының қоғамдық қабылдауларына 2 000-нан астам өтініш келіп түсті, оның 46 пайызы оң шешім тапты. Партия Төрағасының бастамасымен қолға алынған «Халыққа көмек» жобасы қоғамдық қабылдау бөлмелерінде сәтті жұмыс істеуде
– Мемлекет басшысы Қасым-Жомарт Тоқаевтың «Сындарлы қоғамдық диалог – Қазақстанның тұрақтылығы мен өркендеуінің негізі» атты Қазақстан халқына Жолдауында жүктелген негізгі міндеттер мен талаптар бойынша, өңірде атқарылып жатқан жұмыстарға тоқталып өтсеңіз?
– Мемлекет басшысы Қасым-Жомарт Тоқаев «Сындарлы қоғамдық диалог – Қазақстанның тұрақтылығы мен өркендеуінің негізі» атты Жолдауында еліміздегі түрлі әлеуметтік мәселе бойынша туындап отырған бірқатар жайттарды айтқан болатын. Бұл ретте Президенттің балаларға қолжетімді болуы үшін шағын және орташа оңалту орталықтарының желісін кеңейту туралы тапсырмасын ерекше атап өткен жөн. Бүгін Жолдауда айтылған тапсырмаларды іске асыру мақсатында, ерекше балаларды өмірге бейімдеу үшін білікті мамандар тарапынан үздіксіз психологиялық-педагогикалық түзету, қолдау мақсатында қалада арнайы түзету балабақшасы ашылды. Балабақшада аутизмге шалдыққан, тірек-қимыл аппараты бұзылған, психикалық дамуы тежелген, ақыл-ойы шала дамыған, сөйлеу қабілеті бұзылған, Даун синдромы бар мектепке дейінгі жастағы балаларды бейімдеуге мүмкіндік бар. Сондай-ақ балабақшаның кадрлық құрамына «Серпін» бағдарламасы бойынша білім алған арнайы мамандар тартылды. Айта кетейік, қазіргі кезде облыста 18 жасқа дейінгі 3 471 мүмкіндігі шектеулі бала бар. Оның 743-і «церебральды сал ауруы» диагнозымен ауырады.
Ұзақ жыл бойы ерекше білім беру қажеттілігі бар балалардың жазғы демалысын ұйымдастыру және сауықтыру мәселесі де еліміздегі маңызды мәселелердің бірі саналады. «Бақытты бала» жобасы аясында Ақтөбе облысында Қазақстан бойынша алғаш рет «Күншуақ» лагері ашылды. Демеушілік көмекпен лагерь аумағында заманауи ойын, спорт және инклюзивтік алаңдар орнатылды, Монтессори кабинеттері, сенсорлық бөлме, жұмсақ және ойын аймақтары үшін арнайы жабдықтар сатып алынды. Лагерь жыл бойы жұмыс істейді және онда балалардың ата-аналарымен бірге болуына мүмкіндік қарастырылған. Сонымен қатар аутизмі бар балалар үшін «Аяла» оңалту орталығы жұмысын бастады. «Болашақ» корпоративтік қорының қолдауымен қаладағы екі мектепте инклюзивті қолдау кабинеті ашылды. Жолдауда айтылған осындай қоғамдағы түйіні шешілуі тиіс мәселелер кезең-кезеңімен реттеліп жатыр. Алдағы күндері Президент Қасым-Жомарт Кемелұлының Жолдауда айтқан міндеттерінің жүзеге асырылуы туралы жергілікті атқарушы органдардың есебі партия филиалының алаңдарында тыңдалады.
– Халықпен тиімді кері байланыс орнату – басты тақырыптың бірі. Осы уақытқа дейін бұл мақсатта нақты қандай іс-шаралар қолға алынды? Nur Otan партиясының аймақтық филиалдары қанша қоғамдық қабылдау өткізді? Тұрғындар көбінесе қай мәселе бойынша көмекке жүгінді?
– Партия Төрағасы Н.Назарбаев Nur Otan партиясы Саяси кеңесінің отырысында халықтың сұраныстарын уақытылы анықтауды және мемлекеттік органдарға жеткізуді, қоғамдық қабылдау орындарының қызметін мейлінше жақсартуды тапсырды. Бүгін азаматтардың өтініштерін қарау бойынша жұмыс сапасын арттыру мақсатында облыста нақты жұмыстар қолға алынды. Сондай-ақ формализмді болдырмау мақсатында халықтың көп жиналатын орындарында дербес кездесулер ұйымдастырудамыз. Қазір «Заңгерлік көмек» жобасы аясында заңгерлердің көмегіне жүгінетіндер саны артып келеді. «Қазақстан заңгерлер одағы» республикалық қоғамдық бірлестігімен жасалған меморандумның негізінде, қоғамдық қабылдау бөлмесінде білікті заңгерлер кеңес беріп отыр. Бүгінгі күні 32 қабылдау ұйымдастырылып, 65 азамат мамандардан тегін заңгерлік кеңес алып, мәселесін шешуге мүмкіндік алды.
«Ақтөбе облысының медиаторлар кеңесі» қоғамдық бірлестігімен бірге «Татуластыру орталығы» жобасын іске асыру жоспарланып отыр. Сонымен қатар барлық партия филиалы мен мәслихаттардағы фракция мүшелерінен бастап әкімдер, басқармалар мен кейбір департаменттердің басшылары халықпен әлеуметтік желілерде онлайн чат арқылы азаматтарды толғандыратын мәселелердің оң шешім табуына көмектеседі.
Жыл басынан бері Ақтөбедегі партия филиалдарының қоғамдық қабылдауларына 2 000-нан астам өтініш келіп түсті, оның 46 пайызы оң шешім тапты. Партия Төрағасының бастамасымен қолға алынған «Халыққа көмек» жобасы қоғамдық қабылдау бөлмелерінде сәтті жұмыс істеуде. Аталған жоба аясында мемлекеттік орган өкілдерінің, фракция мүшелерінің және үкіметтік емес ұйым өкілдерінің қатысуымен 521 тұрғынды қамтыған 59 қабылдау өтті. Қоғамдық қабылдауға көбіне тұрғындар тұрғын үй мәселесімен немесе жұмыс сұрап келеді. Жұмысқа орналастыру мәселесімен келген азаматтарға мемлекеттің Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» мемлекеттік бағдарламасы шеңберінде жәрдем беруге атсалысудамыз.
Тұрғын үй мәселесін шешуде өңірде «Нұрлы жер», «7 – 20 – 25», «Бақытты отбасы» бағдарламалары тиімді жүзеге асырылып келеді. Азаматтардың баспана алу құқығын іске асыру үшін облыстық бюджеттен тұрғын үй сертификаттары түрінде ұсыну үшін 200 млн теңге сомасында қаражат бөлінді. Жыл басынан бері «Нұрлы жер» бағдарламасы аясында Ақтөбе қаласы және облыс аудандарында 155 отбасы жергілікті атқарушы органның кезек тәртібімен тұрғын үймен қамтамасыз етілді. «Бақытты отбасы» бағдарламасы басталғаннан бері қала әкімдігімен 1 468 жолдама берілді, оның ішінде 530 отбасы «Қазақстанның тұрғын үй құрылыс жинақ банкі» АҚ Ақтөбе филиалына 2% жеңілдікпен несие беру бағдарламасы аясында тұрғын үй алуға өтініш берді. Оның 179-ы – көпбалалы отбасы.
– Елбасы Nur Otan партиясы Саяси кеңесінің жиынында партия қатарына жастарды көбірек тарту қажет екенін ерекше атап өтті. Бұл мәселе облыста қалай шешілуде?
– Қазір облыстың жалпы халық (877 300) санының 23,1 пайызын 29 жасқа дейінгі жастар (202 685) құрайды. Ал партия қатарындағы жастардың үлесі – 20,4 пайыз. Партия қатарына жастарды тартуда бұл көрсеткішпен тоқтап қалмаймыз. Жыл сайын «Серпін» бағдарламасының түлектері мен «Дипломмен ауылға» бағдарламасымен ауылға барған жастарымызды салтанатты түрде партия қатарына қабылдау шаралары дәстүрге айналған. Биыл еңбек етуге жолдама алған 553 жас маманды партия қатарына қабылдадық. Жастардың басым бөлігі Jas Otan Жастар қанатының құрамына шоғырланған. Партияның жүзеге асырып отырған «Ардагерлерді ардақтайық», «Кедергісіз келшек», «Бақытты отбасы» жобалары аясындағы шараларды жүзеге асыруда жастардың құлшынысы ерекше. Жоғары оқу орындарындағы жемқорлықтың алдын алу жұмыстары бойынша да жастарымыз тындырымды жұмыстар атқарып отыр. Қаладағы 2 мемлекеттік жоғары оқу орны мен 16 кәсіптік білім беру мекемелерінің студенттері мен студенттік жатақхана тұрғындары арасында жасырын сауалнамалар жүргізілді. Анықталған ақпараттарға негізінде оқу орындарының өкілдеріне түсіндіру жұмыстары жүргізілді.
– Партияны қайта жаңғырту бойынша нақты қандай жұмыстар жүргізіліп жатыр?
– Елбасының Саяси кеңестің кеңейтілген отырысындағы тапсырмасымен депутаттық фракция мүшелері адамдар көп жиналатын жерлерде, базарлар мен ірі мекемелерде халықпен кездесулер өткізуде. Фракцияның, бюро және партиялық бақылау комиссиясының жұмыс жоспарлары жаңартылды. Партия активтерінің аудандар мен шалғай ауылдарға шығу кестесі бекітілді. Күн тәртібіне тұрғындардың өзекті мәселелері шығарылды. Жергілікті атқарушы органдардың кейбір басшылары мен депутаттық фракция мүшелерінің партиялық жауапкершілігін қарау жоспарға енді. Сонымен бірге белсенді азаматтық қоғам өкілдерін партиялық жобаларды жүзеге асыруға және мемлекеттік бағдарламалардың орындалуын бақылауға жұмылдыру жұмыстары қолға алынды. Сондай-ақ партияның депутаттық фракциясы да облыс әкімінің аппаратымен және жергілікті мәслихаттармен тығыз жұмыс орнатып жатыр.
Партияның өңірлік филиалы әлеуметтік интернет желілерінде депутаттық фракция мүшелерінің белсенділігіне талдау жүргізді. Сонымен қатар партияның сайлауалды бағдарламасын жүзеге асыру бағыттары бойынша депутаттық фракцияның мүшелері басқаратын партия кураторлары комиссияларының 32 отырысы ұйымдастырылып, арнайы рейд жұмыстары жүргізілді. Оның қорытындысы бойынша мемлекеттік органдар мен түрлі ұйымдарға 148 ұсыныс шығарылды. Биыл депутаттық фракциямен және оның мүшелерімен 600-ден астам түрлі іс-шара және БПҰ мүшелерімен, еңбек ұжымдарымен және басқа да кездесулер өтті.
– Әңгімеңізге рақмет!
Сұхбаттасқан
Абылайхан ЖҰМАШ