Дендер топырағында дүбірлі рухты шара өтті. Зар заман ақыны Мұрат Мөңкеұлы мен қазақтың тұңғыш бард ақыны Табылды Досымовтың ескерткіштері ашылды.
Еліміздің бас қалалары мен аймақтардан келген қонақтар, жергілікті тұрғындар, Сенат және Мәжіліс депутаттары, жергілікті атқарушы билік өкілдерінің қатысуымен өткен ескерткіштердің ашылу салтанатында облыс әкімінің бірінші орынбасары Серік Шәпкенов аймақ басшысы атынан халықты қуанышты күнмен құттықтады.
Ескерткіштің ашылуында сөз алған жазушы Мереке Құлкенов замана шежіресін, дәуір шындығын, халық қасіретін тайсалмай жырлаған Доспамбет, Қазтуған, Махамбеттей ұлт тұлғаларының бай мұрасын бүгінге жеткізген Мұрат Мөңкеұлының рухы ұрпақтың намысын қайрап, ұлттың еңсесін түсірмейтінін айтып, ақпа ақынның ескерткіш болып оралуымен жұртшылықты құттықтады.
Махамбет батырдың арғымағының тұяғының ізі қалған Дендер ауданы орталығында тұғырға тұрған ескерткіштің авторы Қазақстан Суретшілер одағының мүшесі, белгілі гобеленші Жақып Құттыбек. Ескерткіштің биіктігі – 7 метр. Таза қоладан құйылған ақын тұлғасы халықтың санасында мәңгілік жаңғырып, ұлттың замана тағдырын ұмыттырмайтынымен айшықталып тұрғандай.
Зар заман ақыны Мұрат Мөңкеұлының келешек үнін жалғай келген қазақтың тұңғыш бард ақыны Табылды Аяшұлының ескерткішінің ашылу салтанаты да жиылған жұртшылықты тебірентіп, жанарлардан жас төгілтіп, есте қалды.
Махамбет бабаның жасында дүниеден өткен барды ақын Табылдының ескерткішіне аңғарымпаздықпен қараған адам ескерткіштің әр деталі сөйлеп тұрғанын аңғара алады. Елу жасқа да жетпеген ақынның құлпытасы іспетті биіктіктің төрт бөліктен сәл жоғарылап келіп қиғаштай кесілуі оның қай жаста дүниеден өткенін меңзеп, ұшар басына құстарды қойғаны да Табылды шырқаған әндердің өміршеңдігін суреттеп тұрғандай әсер қалдырса, ақынның гитарасымен тұрған алып тұлғасы, туған жерінде жоқ таудың биіктігіндей болып өткенін паш етіп тұрғандай. Елімізге белгілі мүсінші Бахытбек Мұхамеджанов қолтаңбасы болған осынау кіші сәулетті композициялық ескерткіштің әр деталіне үңіле қараған қарасы қалың жұртшылық легі біразға дейін ескерткіш алдында аялдап қалды.
Табылды Досымовтың ескерткішінің кең аумақты саябақта тұруы болашақта ескерткіш алды бард ақынның өнерін жалғастырушы өнерпаздарды алдына шоғырландырып, саябақта Табылды әндері шырқалып тұрарынан хабар бергендей...
Қос ақынды тұғырына тұрғызып, қуанышқа кенелген халық Мәдениет үйінде «Мұраттан Табылдыға дейін – Ұлылар үндескен күн» атты сахналық қойылым, концерттік бағдарламамен жалғасты.
Атырау облысы