– Бұл кешендегі құрылғылар Еуропада жасалған тренажерлерді алмастыра алады және күн сайын 40-50 адамға оңалту жаттығуларын жасауға мүмкіндік береді. Біз оны өз орталығымызда қолданып жатырмыз, мұнда Қазақстанның әр аймағынан келушілер көп. Басқа өңірлердегі көптеген ата-анадан осы құрылғыларға сұраныс артып, олар жергілікті денсаулық сақтау мекемелерінен дәл осы кешендерді сатып алуды сұрап отыр. Осыған байланысты біз өзіміздің жаттығу құрылғыларымыз арқылы мемлекеттік оңалту орталықтарында мүмкіндігі шектеулі жандарға қызмет көрсетуге дайынбыз, – деді Александр Мякота.«Nur Otan» облыстық филиалының басшысы ұсынылып отырған бұл әдістеме мен жабдықтар тиімді болған жағдайда ғана мемлекеттік-жекеменшік әріптестік орнатуға болатынын айтты. Әбілқайыр Сқақов бір ай ішінде барлық мүмкіндік қарастырылып, аталған мәселе партия тарапынан бақылауға алынатынын жеткізді.
– Егер олар ерекше қажеттіліктері бар балаларға көмектесіп жатқан болса, біз мұндай рационализаторлық шешімдерді міндетті түрде қолдайтын боламыз, – деп түйіндеді сөзін «Nur Otan» партиясы Павлодар облыстық филиалының төрағасы. Сондай-ақ қабылдау кезінде Әбілқайыр Сқақов Павлодар, Екібастұз қалаларының және Павлодар ауданының тұрғындарымен тілдесті. Олардың сұрақтары медициналық тексеруге, қашықтан оқу үшін ноутбук жетіспеушілігі және үйлері өртенгендерге тұрғын үй бөлуге қатысты болды. Барлық мәселе партиялық бақылауға алынды.
Әбілмансұр ЖАСАН