Көзі тірісінде «Сәулелі сәттерімнің бәрін ақ қағазға түсіруге тырыстым» деп, өз оқырманын тапқан қаламгер Рахымжан Отарбаевтың кітаптары орыс тіліне аударылды. Жақында ғана жазушы-драматургтің осы екі кітабының презентациясы Мәскеуде өткен еді. «Художественная литература» баспасының бас редакторы Владимир Пряхиннің аудармасымен орыс тілінде жарық көрген екі томдық повестер жинағының таныстырылымы Ұлттық академиялық кітапханада өтті.
Отарбаевтың шығармашылығына әр елдің оқырманы үлкен қызығушылық танытады. Әдеби сыншылардың айтуынша, оның жұмыстары көп адамның жанына жақын. Себебі шығармалары өмірдің мәні, рухани құндылықтар мен адамдар арасындағы өзара қарым-қатынас туралы терең ойға жетелейді. Отарбаев туындыларын тек ана тілінде ғана жазғанымен, оның әдеби мұрасы көптеген халықтар арасындағы мәдени көпірге айналды. Отарбаевтың шығармалары осыған дейін қазақ және орыс тілінде ғана емес, француз, қытай, араб, түрік, қырғыз және ағылшын тіліне де аударылған.
Владимир Пряхин бұл жобаны елшіліктің қолдауымен іске асырыпты. Кеш барысында қазақ әдебиетіне тосын бояу, соны рең әкелген қаламгердің достары, әріптестері жылы естеліктерімен бөлісті. ХХ ғасыр басындағы Алаш қайраткерлері тәуелсіздік, бостандық үшін күрессе, Рахымжан Отарбаев ХХІ ғасыр басында ұлт үшін, ар мен ұят, ынсап пен иман үшін күрескен қаламгер екені тілге тиек болды. «Рахымжан Отарбаев өте танымал қылқалам шебері, сөз шебері. Ол – тек Қазақстанда ғана емес, шетелде де белгілі қаламгер. Менің ойымша, Рахымжан Отарбаевтың шығармашылығын зерттейтін адамдар одан көптеген құндылықтар табады, оның шығармашылығында әлі ашылмаған дүниелер жетерлік. Оның тағы бір зерттелмеген тұсы – драматургиясы. Көптеген талантты сыншылар Рахымжан Отарбаевтың драматургиясы туралы көп жазады. Менің ойымша, оның екінші шығармашылық өмірі ол өмірден озғаннан кейін басталды» деді әдеби сыншы Амангелді Кеңшілікұлы.
Қай шығармасын оқысаң да, оның негізгі кейіпкері қазақы рухты, таза қазақы болмысты ұстанатын жазушының шығармалары қалай ұлықталса да жарасады.
«Атырау өңірінен делегация болып келіп тұрмыз. Ал Рахымжанның өзінің туған жері – Құрманғазы мен Динаның, Әбу Сәрсенбаев пен Хиуаз Доспанованың, Жұмекен Нәжімеденов секілді мақтаныштарымыз өмірге келген мекен. Рахымжанды қазақ халқы үшін ұлы тұлға деп есептейміз. Себебі оның қаламынан шыққан шығармалары, драматургиясы бүкіл дүниежүзін шарлап кетті» деді Атырау облыстық қоғамдық кеңестің төрағасы Мұрат Өтешов. Кітаптың таныстырылымына жазушының жары Сәуле Отарбаева мен ұлы Ермерей Отарбаев та қатысты. Сондай-ақ шара барысында әдебиеттанушы Гүлзада Ниетқалиеваның жазушы шығармашылығына арналған зерттеу кітабы таныстырылып, фотокөрме және сахналық қойылымдар көрсетілді.