Президент Қасым-Жомарт Тоқаев елордада өткен «Рухани құндылықтар – қоғам бірлігінің негізі» атты ІІІ республикалық имамдар форумының қатысушыларына құттықтау хатын жолдады. Бұл туралы "Қазақпарат" хабарлайды.
Мемлекет басшысының құттықтау хатын ҚР Президенті Әкімшілігінің басшысы Ерлан Қошанов оқып берді. «Құрметті форумға қатысушылар! Баршаңызды игі дәстүрге айналған имамдар форумының ашылуымен шын жүректен құттықтаймын. Парасаттылық, отансүйгіштік, адамгершілік қасиеттерін халықтың санасына сіңіру – сауабы мол абыройлы миссия. Ислам дінінің осындай ізгі құндылықтары еліміздегі мұсылмандар қауымын біріктіріп, ынтымағын арттырып отыр. Имамдарымыз халық арасында рухани, ағартушылық жұмыстарын ұдайы жүргізіп, жас ұрпақтың бойына имандылықты дарытуға атсалысуы өте маңызды», - делінген құттықтау хатта. Президенттің атап өтуінше, бүгін де елордамыз әлемдік және дәстүрлі дін көшбасшылары бас қосатын өркениетаралық диалог алаңы екенін мойындалған. «Биылғы Қазақстан халқына Жолдауда халқымыздың ұлы перзенттері – әл-Фараби, Абай сынды ойшылдардың еңбектерін кеңінен дәріптеу қажеттігін атап өткен болатынмын. Сондықтан, қоғамдағы татулық пен келісімді нығайту арқылы Қазақстан халқының тұтастығын сақтап, ұлттық болмысымызды айшықтау – баршамызға ортақ парыз. Бұл жиын Қазақстан мұсылмандары діни басқармасының жұмысына және еліміздегі дін өкілдерінің рухани бастамаларына тың серпін береді деп сенемін. Форум жұмысына сәттілік тілеймін», - дейді Қасым-Жомарт Тоқаев.
Атап өтерлігі елордада өткен форумға ҚР Премьер-Министрінің орынбасары Бердібек Сапарбаев, Ақпарат және қоғамдық даму министрі Дәурен Абаев, мемлекет және қоғам қайраткерлері, ғалымдар, депутаттар, белгілі теологтар, еліміздің әр аймағынан келген 500 имам қатысты.