«Nur Otan» партиясы Саяси кеңесінің отырысында Тұңғыш Президент – Елбасы Н.Назарбаев еліміздің жоғары оқу орындарында сыбайлас жемқорлыққа қарсы күрес жұмыстарын күшейтуді тапсырған болатын. Осыған байланысты «Jas Otan» Жастар қанаты студенттердің өмір сүру деңгейінің сапасын арттыру, әлеуметтік-тұрмыстық жағдайын қамтамасыз ету мақсатында 2019 жылдың қыркүйек айынан бастап ЖОО және ТжКБ жанындағы студенттік жатақханаларға жүйелі мониторинг жүргізіп келеді.
«Таза сессия» акциясы аясында «Nur Otan» партиясы жанындағы «Jas Otan» Жастар қанатының ұйымдастыруымен Шымкент қалалық Төтенше жағдайлар департаментімен бірлесе жүргізілген тексеріс жұмыстары жалғасын табуда. Аталмыш шара аясында қаладағы SilkWay Халықаралық университетінің, М.Әуезов атындағы ОҚУ-дың және ОҚМПУ-дың жатақханаларына мониторинг жүргізілді. Тексеріс барысында көптеген жатақханалардың санитарлық нормаға, тұрмыстық жағдайға сәйкес келмеуі және орындардың шамадан тыс толу фактісі анықталды. Анықталған фактілер нәтижесінде оқу орындарының басшылығына ескертулерді жою бойынша ұсыныстар берілді. Сонымен қатар «Jas Otan» Жастар қанаты ШҚОФ «Өскемен политехникалық колледжі» КМҚК жатақханасында рейд өткізді. Мониторинг тобы ашық тоқ көздерін қолға алу, тозығы жеткен есіктерді ауыстыру, терезе жақтауларын жаңарту жұмыстарын қараша айының 1-не дейін толығымен аяқталуын тапсырды. Жатақханалар мониторингі жалғасуда, келесі кезекте – «Семей медицина университеті» КЕАҚ жатақханасы. Айта кетейік, шараның негізгі мақсаты – білім іздеп келген жас білімгерлерге жатақханада тиесілі орынды заң аясында белгіленген тәртіппен берілуі және жатақханаға қажетті құралдармен жабдықталу мәселесіне бақылау жүргізу. Мұндай мониторинг жұмыстары 23-29 қараша аралығында жалғасады.Әбілмансұр ЖАСАН