Қалада қандай да бір келеңсіздік пайда болса, оған Nur Otan партиясы бірінші болып назар аударуға тырысады. Осы жолы да солай. Партияның қалалық филиалы Медеу ауданы тұрғындарының арызына көңіл бөлді.
Шаһардың тау беткейінде тұрып жатқан тұрғындар біраздан бері көңірсіген күлімсі иіспен тыныстауға мәжбүр болып жүр. Оған кінәлі зауыт та, фабрика да емес, кәдімгі баспахана. Күні кеше партия филиалының басшылығы Алматы қалалық Санитарлық-эпидемиологиялық қадағалау басқармасы және Алматы қаласы мамандандырылған табиғат қорғау прокуратурасымен бірігіп аталған мекемеге бақылау жүргізді. Сөйтіп, жағдаймен мейлінше тереңірек танысты.
Кәсіпорын сыртқа шығарып тастаған зиянды қалдықтар тұрғындардың денсаулығына қауіп төндіре бастаған. Адамдардың басы, асқазаны ауырып, соңғы кезде көздің жасаурауы да жиілеп кеткен. Тұрғын Павел Шутьевтің айтуынша, кәсіпорын жұмысының кесірінен әйелі соңғы бірнеше айда 3 рет инсульт алған. Алайда денсаулығымен әуре болған жалғыз бұл отбасы емес. Тәттімбет көшесінде тұратын өзге де азаматтар денсаулықтарының нашарлағанын сезген. Сол себепті, олар үнемі бетперде тағуға мәжбүр. Балаларын да көшеге шығаруды сиреткен. Тұрғындар қалалық әкімдікке, прокуратураға арыз жазған, мекеме басшыларын сотқа да берген. Осыған байланысты 3 сот отырысы да өтіп үлгеріпті. Алдағы бір айда қорытынды отырыс өтуі тиіс.
Партия басшылығы баспаханаға барғанымен, оларға да, журналистерге де мекеме аумағына кіру мүмкін болмады. Сот үкіміне дейін мекеме иелері жағдайды баяндауға, ішке ешкімді кіргізуге құлықты емес.
– Қазір Санитарлық-эпидемиологиялық мемлекеттік департаментімен бірге аталған жағдай бойынша іс сотқа жөнелтілді. Онда мекеме жұмысын тоқтату және тұрғындарға материалдық шығын өндіріп беру атап көрсетілген. Партия бұл мәселені толық шешімін тапқанға дейін бақылауына алады, – дейді қалалық партия филиалы төрағасының бірінші орынбасары Станислав Канкуров.
Абай ҚАЗБЕКҰЛЫ