Ауыл шаруашылығы министрлігіне қарасты корпорацияның директоры ірі көлемде пара алды деп күдікке ілінді.
Сыбайлас жемқорлыққа қарсы қызмет баспасөз қызметінің хабарлауынша, «ҚазАгро» холдингінің «Аграрлық несие корпорациясы» АҚ Басқарушы директоры - Басқарма мүшесі аса ірі мөлшерде алаяқтық жасады деген күдікке ілінген.
«Сыбайлас жемқорлыққа қарсы қызметі Қазақстан Республикасы Ауыл шаруашылығы министрлігі «ҚазАгро» холдингінің «Аграрлық несие корпорациясы» АҚ Басқарушы директоры - Басқарма мүшесіне қатысты сыбайлас жемқорлық қылмысын жасады деген күдікпен сотқа дейінгі тергеуді бастады» делінген хабарламада. Ол мемлекеттік функцияларды орындауға уәкілетті тұлғаға теңестірілген бола отырып, өз құзыретіне кірмейтін шешімді қабылдағаны - Ақтөбе облысында орналасқан кепілдік мүлік - элеваторды сату-сатып алу келісімшартын жасағаны үшін алдау және сенімді теріс пайдалану арқылы «Интер-Агро» және «ИнтерАгроТрейд» ЖШС құрылтайшысы мен басшысына тиесілі бұрын келісілген 200 мың АҚШ долларынан 20 миллион теңгені иемденіп кеткен.
Күдікті ұсталған. Нұр-Сұлтан қаласы Полиция департаментінің уақытша ұстау изоляторына қамалды. Тергеу жалғасуда.