Президент Қасым-Жомарт Тоқаев «Сындарлы қоғамдық диалог – Қазақстанның тұрақтылығы мен өркендеуінің негізі» атты халыққа Жолдауында әр отбасының өсіп-өнуіне, дамуына арнайы тоқталған болатын. Осыған орай, Қызылорда облысында Мәжілістің әлеуметтік-мәдени даму комитетінің «Отбасының әлеуметтік картасын енгізу барысы» тақырыбында көшпелі отырысы өтті.
Облысқа арнайы сапармен келген Қазақстан Парламенті Мәжілісінің депутаттары Сырдария ауданында болып, Тереңөзек кентіндегі бірқатар әлеуметтік нысанды аралаған болатын. Депутаттар жұмыспен қамту орта-лығында халықпен кездесіп, ол жерде оларға «Е-халық» ақпараттық жүйесі платформасында отбасының әлеуметтік картасын жасау жұмыстарының барысы таныстырылды.
Шағын кездесуде Гүлшара Әбдіқалықова бастаған депутаттар сұрағына облыстық жұмыспен қамтуды үйлестіру және әлеуметтік бағдарламалар басшысы Талғат Дүйсебаев жауап берді. Келушілер әлеуметтік карта арқылы жекелеген отбасылар жайлы мәліметті анықтау жолдарын көрді. Сонымен бірге онда жинақталған анықтамалардың шынайылығына талдау жүргізілді. Бұдан кейін депутаттар аудан орталығында ашылған әлеуметтік дүкенге барып, кәсіпкерлер тарапынан қолдау тапқан нысан жұмысымен танысқан еді. Сол кезде «Аптасына екі күн жұмыс істейміз. Мұнда бес түрлі халық тұтынатын тауар – сиыр еті, өсімдік майы, ұн, күріш, қант бар» деген жұмысшылар аз қамтылған әр отбасына бағасы төмендетіліп берілетінін айтты. Дүкеннің жұмысына арнайы бақылау жасайтын топ та құрылған. Ал киім-кешектер мұнда тегін таратылады.
Одан кейінгі сапарларын депутаттар бөлініп жалғастырды. Г.Әбдіқалықова, Б.Смағұл, Н.Әлімжанов Nur Otan партиясының аудандық филиалы ғимаратында тұрғындарды жеке өтініштері бойынша қабылдады. Қабылдауға келгендер тарапынан кенттегі А.Иманов пен Н.Ергешбаев көшелерінің қиылысында салынуы жоспарланып отырған көпқабатты тұрғын үй құрылысын қаржыландыру, Шаған ауылының аумағынан өтетін «Батыс Еуропа–Батыс Қытай» автожолының бойынан айналма көпіріне өткел салу мәселесі, тұрақты жұмысқа орналасу, «Қызылорда–Тереңөзек–Жалағаш» автожолына жөндеу жұмыстарын жүргізу секілді өтініштері тыңдалды. Депутаттар К.Абсатиров, Н.Жұмаділдаева, Ф.Қаратаев олимпиадалық резервтің мамандандырылған балалар мен жасөспірімдер мектебінде болып, жастармен жүздесті. Ал Г.Шиповских, З.Аманжолова кейбір әлеуметтік нысандарды аралап, жұмыстарын бақылап шықты. Шаған ауылындағы Келдібаевтар отбасына К.Мұсырман, А.Нұркина, Ж.Омарбековалар барып, хал-жағдайларын біліп қайтты.
Н.Ілиясов ауылында жалғасқан сапар мәдениет үйінде комитеттің «Отбасының әлеуметтік картасын енгізу барысы» тақырыбында көшпелі отырысына жалғасты. Ол жерде әлеуметтік-отбасылық картаны енгізу мен қолдану мәселесі айтылды. «Аталған жүйені дамытуды тоқтатпауды, жетілдіруге тиіс тұстары әлі де бар екенін баса айтқым келеді. Осыған байланысты тиісті министрлікке ұсыныс берілді. Әрі бұл айтылған мәселелер алдағы Үкімет сағатында талқыланады», – деді Г.Әбдіқалықова. Сонымен қатар электронды картаны пайдаланудың перспективалары, әлеуметтік қызмет пен көмек көрсетудің интеграцияланған моделін дамыту, балалар құқықтарын қорғау, медициналық көмекті ұйымдастыру мәселелері ашық айтылды.
Еңбек және халықты әлеуметтік қорғау вице-министрі Ерлан Әукенов, облыс әкімінің орынбасары Бақыт Жаханов, «Қазақстанның әлеуметтік жұмыскерлері ассоциациясы» қоғамдық бірлестігінің төрайымы Ләззат Нұрқатова, Мәжіліс депутаты Бақытбек Смағұл және бірнеше министрлік өкілдері хабарлама жасады. Сапар барысында мәжіліс депутаттары Н.Ілиясов және Шіркейлі ауылындағы бірқатар мемлекеттік мекемелер мен білім беру орындары жұмысымен танысып, жергілікті жұртшылықпен де жүздесті.
Бұдан соң Қазақстан Парламенті Мәжілісі депутаттарының сапары Қызылорда қаласындағы сол жағалаудағы жастар орталығында жалғасты. Мұнда олар белсенді жастармен жүздесіп, сауалдарына жауап берді. Ғимарат алдында сап түзеген «Қызылорда айбындарының» сарбаздары өздерінің ерекше дайындығын көрсетті. Ұрандаса айбынын асырып, жұрттың жігерін жанитын жастардың ынта-ықыласына, әскерде борышын өтеуге талпынысына тәнті болған Мәжіліс депутаты Бақытбек Смағұл жалынды жыр оқып, жастардың рухын көтерді. «Шұбырынды болса-дағы ақтабан, Қазақ елін ешқашан да сатпаған» деп ұлттың ұлылығына тоқталып өтті.
– Міне, біздің болашақ Отан қорғайтын сарбаздарымыз. Мұндай ұйым Қазақстанның барлық жерінде бар. Бірақ Қызылорданың сарбаздары ерекше. Кеудесінде Отан деп соққан жүрегі, еліне аппақ тілегі, осындай өрендеріміз өсіп келеді, – деді Б.Смағұл.
Орталықта 10 мыңға тарта қоры бар кітапхана жұмыс істейді. «Біздің кезімізде мұндай мүмкіндік болған жоқ. Қазіргі жастарға барлық жағдай жасалған. ІТ кітапханаға компьютер де қойылған. Бір кітапты алу үшін сағаттап күтетін едік. Жаңа дәуір жастары, бүгінгі заман – сіздердікі», – деді Мәжіліс депутаты Зәуреш Аманжолова.
Меймандар мұнан соң коуоркинг орталығында болды. Осыны көріп, Парламент Мәжілісінің депутаттары Сыр жастарының белсенділігіне риза болды.
Миуа БАЙНАЗАР
Қызылорда облысы