Қолайсыз ауа райын байланысты еліміздің тағы бірнеше өңірінде жол жабылды,– деп хабарлайды ҚазАқпарат.
«ҚазАвтоЖол» кәсіпорнының мәліметі бойынша, Ақмола облысында «Екатеринбург-Алматы» автожолының 1291-1353 шақырымы жабылған.
Бұл - Жалтыркөл ауылынан бастап Қарағанды облысының шекарасына дейінгі аралық.
Сонымен бірге «Нұр-Сұлтан-Петропавл» жолының 18-231 шақырымы, яғни елордадан Щучинск қаласына дейінгі жол жабық.
Қарағанды облысында да қатты аязға байланысты 2 қаңтар кешкі 18:00 бастап «Екатеринбург-Алматы» тасжолының 1353-1425 шақырымында, атап айтқанда Ақмола облысы шекарасынан Теміртау қаласына дейін дизель қолданатын көліктің жүруіне рұқсат жоқ.
Дәл осындай шектеу «Нұр-Сұлтан-Қабанбай батыр-Нұра-Теміртау» жолының 51-104 шақырымында да енгізіліп отыр.
Одан бөлек, «Қызылорда-Павлодар» автожолының 1066-1135 шақырымы - Молодежный елдімекенінен Павлодар облысының шекарасына дейінгі аралық жабылды.
Алматы облысында да осындай жағдай. Бүгін сағат 17:00 бастап «Алматы-Өскемен» тасжолының 558-615 шақырымында, Үшарал қаласынан Шығыс Қазақстан облысының шекарасына дейін дизельмен жүретін және қоғамдық көліктің қозғалысына шектеу қойылған.
Сондай-ақ Павлодар облысында 2 қаңтар кешкі 18:00 бастап барлық бағыттағы жолдарда дизель қолданатын көліктер мен автобустардың жүруіне тыйым салынды.
Сонымен қатар Қостанай мен Шығыс Қазақстанда да көлік қозғалысына шектеу қойылған.
