Жақында «Дариға-ай» жастар театры жастар театры екенін тағы бір дәлелдеп шыққандай... Оның жаңа қойылымы «Бар қазаққа ән салдырған Шәмші!» деп аталады. Шақырды, бардық, көрдік. Көрермен ретінде үлкен әсер алып қайттық.
Біз Шәмші заманындағы ауыл жастары едік, көңілді бас- қосуларда Шәмшінің әндерін шырқадық, шырқағанда тура өз жүрегімізден шыққандай етіп шырқадық! Ол кезде бүкіл қазақ даласы Шәмшінің әнімен тербетіліп тұрғандай еді... Ал Шәмші туралы білетініміз шамалы еді, әлдебір аңыздар, әлдебір дақпырттар еміс-еміс құлағымызға жететін... Жастар театры сахналаған спектакль-концертінде Шәмші ағамызбен қайта кездескендей күй кешкенімізді қайтерсің?! Ғалымбет Тасболатовтың Шәмші бейнесі, тағдыры талайлы композитордың образын санамызда қайта тірілткендей, Шәмшіні бүгінге алып келгендей көрінді. Қарапайым да нанымды, боямасыз, біздің жүрегімізде ұялаған, құлағы қалқиған қалпында елестеткенін айтсаңшы! Өзі де, түп төркіні Шымкенттің жігіті ұлы тұлғаны асқақ пафоссыз Семейге алып келгендей екен... Басты бейненің нанымды шыққаны сондай, кешегі Теміржанмен, Ілиямен өзіміз де бірге болғандай, олардың жан дүниелерін жасанды-жалғандықсыз, өтірік жаны ашығансымақсыз, барын барша, жоғын жоқша сезіндік. Өнерпаздың біз өмір сүрген кешегі қоғамда да, біз өмір сүріп жатқан бүгінгі қоғамда да осылай боларына тағы да бір рет көзіміз жеткенін білдік... Спектакльдің әнін әрлеген әрі хормейстері Олжас Тезекбаевтың еңбегі туралы бір ауыз пікір білдіруге шамамыз жетсе деп тілек тілейік. Жандүниесі музыкаға толы осынау жас жігіттің Семейге оралғанына да көп болған жоқ. Әкесі Сағынай Тезекбаев марқұм да ән десе ішкен асын жерге қоятын, дауыстардың мың түрлі бояуын құлағымен емес, жүрегімен ұғатын азамат еді, әкесі дүниеден өткен соң Семейіне келді де, әке жолын жалғастырды... Осы спектакльдің музыкасын мұрындықтап, жетелеп шықты десе де болғандай. Осы жігіттің арқасында речитативтік-публицистикалық стильге құрылған жастар театры – музыкалық драма театрына айналғандай... Қазақы ұлттық-халықтық негіздегі Шәмші әндері көп дауысты, сылдырап аққан сансыз бұлақтардың түйісіп, үйлесіп, жамырағанындай қуатқа айналып, бүкіл Семей ән салып тұрғандай сезілді бізге... Бір ғана «Сыған серенадасын» алайық! Тоқтар Серіков Шәмші шығарғаннан көп жыл өткенде бүкіл қазақ даласына асқақтата қалықтатса, Ғибрат Азубаев бұл әннен «ән-спектакль» жасаған болатын... Ал Олжас Тезекбаев бұл әнді көп дауысты ән-драмаға айналдырғанына көзіміз жетті. Жастар театрының бұрынғы Әкпарәліден басталатын стилі мен динамикасы осында қойылған билер арқылы сақталған деп ойлаймыз. Карина Жиренбаеваның қойған билерінде әлемдік театрлардан хабары мол қоюшы екенінен хабар беріп тұрғандай, би әндерден кейінгі спектакльдің жанындай сезіледі. Спектакльдегі Қалдаяқ (әкесі), Сақыпжамал (анасы), Ақан сері бейнелерін сахнаға шығарған Естай Шәріпұлы, Сымбат Ахметова, Еркебұлан Нұғыманов өз биіктерінен көріне білген майталман актер екеніне тағы да көзіміз жеткенін атап айтуды жөн көріп отырмын. Режиссер Жұлдызбек Жұмабай оркестрдің дирижерындай, «сылдырап өңкей келісімге» қол жеткізген... Семей бүгін ән салып тұрғандай! Іске сәт, жастар театры!Құсмілия НҰР-ҚАСЫМ