Ел Парламенті нотариустердің қызметін цифрландыратын заң қабылдады. Нотариус куәландырған құжаттар енді электронды мұрағатта сақталады. Ал олардың өздері электронды және қағаз нұсқаларының бірдей екенін куәландыра алады. Тиісті құжат Сенат басшысы Мәулен Әшімбаевтың төрағалық етуімен өткен палата отырысында құпталды.
«Кейбір заңнамалық актілерге нотариат мәселелері бойынша өзгерістер мен толықтырулар енгізу туралы» жаңа заң нотариат қызметтерінің сапасын арттыруға және оларды алуды ыңғайлы етуге бағытталған. Жоба депутаттар бастамасымен әзірленген. – Қабылданған заң елімізде нотариат институтын одан әрі жетілдіруді көздейді. Бүгінде Қазақстанда бұл салада 4 мыңнан астам нотариус жұмыс істейді. Осы заң халыққа нотариаттық қызмет көрсету кезінде цифрлық технологиялардың қолданылу аясын кеңейтуге мүмкіндік береді. Сондай-ақ нотариаттық қызметке қойылатын талаптарды күшейтуге құқықтық негіздер қалыптастырады, – деді палата Төрағасы. Депутаттар сонымен қатар Қазақстан Үкіметі мен ЮНЕСКО арасындағы Мәдениеттерді жақындастыру халықаралық орталығын құру туралы келiсiмді ратификациялап, Мемлекет басшысының қол қоюына жіберді. Оған сәйкес, еліміз ЮНЕСКО-ның мәдениетаралық диалог саласындағы саясатын әзірлеуге қатысуға мүмкіндік алады. Елордадағы қазіргі «Мәдениеттерді жақындастыру орталығы» республикалық музейінің негізінде ЮНЕСКО аясында Мәдениеттерді жақындастырудың халықаралық орталығы құрылатын болады. Сенаторлар Еуразиялық одаққа қатысты халықаралық құжаттарды ратификациялады. Оның ішінде «2017 жылғы 11 сәуірдегі ЕАЭО Кеден кодексі туралы шартқа өзгерістер енгізу туралы хаттама», «2017 жылғы 11 сәуірдегі ЕАЭО Кеден кодексі туралы шартқа өзгерістер енгізу туралы хаттама», «2014 жылғы 12 қарашадағы Еуразиялық экономикалық комиссияның бәсекелестіктің бірыңғай қағидаларының сақталуын бақылау жөніндегі өкілеттіктерді жүзеге асыруы кезінде құпия ақпаратты қорғау тәртібі және оны жария еткені үшін жауаптылық туралы келісімге Арменияның қосылуы туралы хаттама», «Бір тараптан ЕАЭО мен оған мүше мемлекеттер және екінші тараптан Сербия арасындағы еркін сауда туралы келісім» бар. Жиын соңында сенаторлар депутаттық сауал жолдады. Н. Төреғалиевтің сауалында БҚО-дағы бірқатар аудандарды сумен жабдықтау мәселелері баяндалды. О.Перепечина білім беру жүйесіндегі, оның ішінде «Күнделік» порталының жұмысындағы олқылықтарды мәселе етіп көтерді. С.Лұқпанов теміржол саласындағы бірқатар өзекті мәселелерге тоқталды. А.Лукин ломбардтар қызметіндегі құқық-бұзушылықтарға, микроқаржы ұйымдарына бақылауды күшейтуге назар аударды.Елдос СЕНБАЙ