«Рухани жаңғыру» бағдарламасы аясында және Абай Құнанбайұлының туғанына 175 жыл толуына орай «Абай – ақын, ойшыл, аудармашы» атты ғылыми семинар өтті. Нұр-Сұлтандағы Достық үйінде өткен басқосуға жоғары оқу орындарының ғалымдары, ҚХА Ғылыми кеңесі және елордалық этномәдени орталықтардың мүшелері қатысты.
Қазақстан халқы Ассамблеясы хатшылығының меңгерушісі Ләззат Құсайынова Мемлекет басшысының «Абай және XXI ғасырдағы Қазақстан» мақаласының халық көңілінен шығып, қолдауға ие болғанын атап өтті.
«2020 жылы Қазақстан халқы Ассамблеясының «Қазақтану» жобасы аясында ойшыл, рухани ұстазымыз ұлы Абайдың 175 жылдығы аталып өтеді. Абай философиясы қазіргі уақытқа дейін өзектілігін жоғалтқан жоқ. Біздің қоғам мүшелерін гуманистік тәрбиелеуге бағыттады. «Ғылым жолына жеткенше мақтанба» және «Ең алдымен адам болып қалу қажет» деп адамгершілікке шақырды», – деді ол.
Тарих ғылымдарының докторы, профессор Марат Әбсеметов рухани жаңғыру, өрлеудің негізі Абай шығармашылығында жатқанын тілге тиек етті.
«Қазір елімізде қай жағынан алсақ та өсу бар. Бізге рухани жағынан өсу қажет, оған негіз болатын – Абай. 1914 жылы Семейде ақынның қайтыс болғанына 10 жыл толуына орай әдеби кеш өтті. Сонда Міржақып Дулатов: «Үнемі бұл күйде тұрмас, халық ағарар, өнер-білімге қанар, сол күндерде Абай құрметі күннен-күнге артар. «Бірінші ақынымыз» деп қабірін халқы жиі-жиі зиярат етер, халық пен Абай арасы күшті махаббатпен жалғасар. Ол күндерді біз көрмеспіз, бірақ біздің рухымыз сезер, қуанар...» депті. Алаш ардақтысының айтқаны айнымай келді...», – деді профессор.
Отырыс барысында «Абай шығармаларын аударудағы үндестік», Абай шығармашылығында кездесетін «Адам» концептісі», «Абай – аудармашы» тақырыптары қозғалды. Одан бөлек, ҚХА ғылыми-сараптама тобының төрағасы Халил Маслов, С.Сейфуллин атындағы Қазақ агротехникалық университетінің доценті Маржан Акошева, «Тұран» білім беру корпорациясының вице-президенті Орақ Әлиев ұлы ойшылдың философиялық ой-тұжырымдары мен шығармаларындағы парасатты ойларын саралаған баяндама жасады.