Көлемі 128 беттен тұратын бұл кітапта сан алуан тақырып қамтылды. Кітап бүлдіршіндердің ана тіліне деген сүйіспеншілігін арттырып қана қоймай, еңбекқорлыққа да баулиды. Автор қазақтың тыйым сөздерін қолданып, өлең жолдарына қосып жазған. Ішкі дизайндағы суреттер балалардың кітапқа деген қызығушылығын арттыра түседі. «400 тәтті тақпақ» кітабының тұсаукесерін белгілі әнші Айгүл Иманбаева жүргізді. Басқосуда көрерменнің де саны көп болды. Жаңа туындының лентасын филология ғылымдарының докторлары Серік Негимов пен Сауытбек Абдрахманов қиды.
– Мұзафар Әлімбаев ағамыз бас редактор болып тұрған кезде «Балдырған» журналында жұмыс істегенмін. Сол кезде ең алғаш балаларға шығарма жазып бастадым. «Төгілген қаймақ» деген әңгімем орыс мектептеріндегі қазақ тілі оқулығына енді. Жақсылық Үшкемпіров пен Әмен Қайдаровпен кездесіп, әңгімелер жазғанмын. Бірақ балалар әдебиетіне бел буып кірісемін деген ойымда жоқ. Қазір немерелерім балабақшаға барады. Ал үйге келгенде, балабақшадағы тәрбиешілері берген өлеңдерді түсінбейді. Әжесі: «Ақынсың ғой қарашы түсінесің бе?» деп маған жібереді. Мен де түсінбедім. Өлеңнің идеясы дұрыс болғанымен, құрылымы балаларға ауыр. Содан өзім жазып берейін деп немерелеріме тақпақтар жазып бастадым, – дейді жазушы Баянғали Әлімжанов.
Автордың айтуынша, балалар тақпақтарды сол бойдан жаттап алыпты. Автордың «Әліппе» атты өлеңін бүкіл қазақ газеттері басқан. Керекулік Назым Дүкенбай деген азаматша өлеңді газеттен алып, әр әріпке музыка шығарыпты. Сөйтіп, «Әліппе әуендері» деген кітап дүниеге келді. Оны «Атамұра» баспасы басып шығарған. Шыны керек, балабақшаға барған балалар да, тәрбиешілер мен мұғалімдер де өлең таппай қиналады. Былай қарасаң, қазақ әдебиеті де, балалар әдебиеті де бай. Бірақ балаларға күнделікті жаттататын тақпақ табу қиын.
– Сондықтан маған тақырыптық жинақ ретінде балалар антологиясын жасау туралы ой келді. Кәсіби мұғалімдермен де сөйлестім. Соның нәтижесінде сан түрлі тақырыпты қамтыған «400 тәтті тақпақ» деген кітап жазылды. Бұрынғы жазғандарыма жаңадан тақпақтар қостым. Енді бітірдім деп ойласам, таңертең ойыма тағы өлең келіп тұрады. Осындай кітап бар деп, «Фолиант» баспасына ұсындым. Бас редакторы Фарида Тобашалова «Аға, мынау керек кітап екен» деп құлшына кірісіп кетті, – дейді автор.
Қызығы, кітаптың алғашқы аты «Бала мен ғалам» болыпты. Кейін «Бар әлемді сүйемін» деп те өзгертіпті. Алайда автор мен бас редактор келісіп, кітаптың тақырыбын заман талабына сай «400 тәтті тақпақ» деп қойыпты. Себебі кез келген бала дүниеге тәттінің көзімен қарайды. Бір ерекшелігі, балалар кітабында көбіне сурет басым, мәтін аз болатын. Ал бұл кітапта керісінше, суреттен тақпақ көбірек. Сонымен қатар кітап балабақша тәрбиешілері мен бастауыш сынып мұғалімдеріне, ата-аналарға көмекші құрал. Бүлдіршін балабақшадан бастауыш сыныпқа барғанша оқи алады. Баспа кітаптың авторлық құқығын 10 жылға алған. Қазір кітап 2000 данамен басылды. Кітап саудасы өткен сайын, таралым да көбейе береді. Ал жазушы Баянғали Әлімжанов: «осы кітапты бүкіл қазақ баласы оқыса деп армандаймын», – дейді. Айта кету керек, қазірдің өзінде «400 тәтті тақпақ» көрмеде ең көп сатылған кітаптардың қатарында.
К.ҚАРҚЫН