Астана қалалық Полиция департаментінің Ұйымдасқан қылмысқа қарсы күрес басқармасының қызметкерлері елордада жезөкшелікпен айналысу үшін үй-жайлар беретін азаматтар мен интимдік қызмет көрсететін тұлғаларды анықтауға бағытталған жедел-профилактикалық іс-шараларды тұрақты негізде жүргізуде, – деп хабарлайды Aikyn.kz.
Осылайша, операция барысында “Kizdar.net” сайты арқылы жарияланған сауналар, денеге массаж жасайтын бөлмелер, интимдік қызмет көрсетілетін пәтерлер тексерілді.
"Нәтижесінде 43 қыз полицияға жеткізілді. Жүргізілген іс-шаралардың барысында ӘҚБтК 450-бабы бойынша 33 әкімшілік хаттама толтырылды. Олар (Жезөкшелік немесе сутенерлік үшін көрінеу үй-жайлар беру) – 10, ӘҚБтК-нің 492-бабы бойынша (Қазақстан Республикасында тіркеусіз немесе жеке басын куәландырмай тұру) – 6, ӘҚБтК 440-бабы бойынша (Қоғамдық орындарға мас күйінде келу) – 6, ҚР ӘҚБтК-нің 449-бабы бойынша (Қоғамдық орындарда азғындау) – 11. 1 шетелдік Қазақстан Республикасының көші-қон заңнамасын бұзғаны үшін қабылдау пунктіне орналастырылды", – деп жазды астаналық полиция департаментінен.
Сондай-ақ, 15 жеңіл жүрісті қыз ақшаға жыныстық қызмет көрсеткені үшін есепке алынған. Олармен профилактикалық әңгіме жүргізілді.