Қайғылы оқиға 16 тамызда Ақтөбе облысы Ембі қаласындағы "Ембі жылу" кәсіпорнында болды. Жұмысшылар метаннан уланып қалды, – деп хабарлайды Aikyn.kz "Мой город" басылымына сілтеме жасап.
Ақтөбе облысының Төтенше жағдайлар департаментінің хабарлауынша, құтқарушылар кәріз-сорғы стансасынан екі адамның денесін шығарды. Олар – 58 жаста. Тағы екі зардап шеккен адам жедел жәрдеммен ауруханаға жеткізілді.
"Олар 46 және 53 жаста, метаннан уланып, Ембі аудандық ауруханасының соматикалық бөлімшесіне жатқызылды. Жағдайы қанағаттанарлық", – деп хабарлады Ақтөбе облыстық Денсаулық сақтау басқармасы аман қалғандар туралы.
Облыстық Полиция департаменті баспасөз қызметінің хабарлауынша, оқиғаға қатысты Қылмыстық кодекстің 156-бабы ("Абайсызда екі немесе одан да көп адамның өліміне әкеп соққан еңбек қауіпсіздігі ережелерін бұзу") бойынша тергеу басталды.
Сараптама, зерттеу мақала, күнделікті өзекті ақпаратты «Айқынның» Telegram арнасынан таба аласыз.