Білім және ғылым министрлігі сабақты онлайн өткізуді тоқтату керек деген шешімге келді. Бұл туралы Орталық коммуникациялар қызметінің алаңында өткен мектеп оқушыларының ІV тоқсанда қашықтан оқу жүйесіне арналған онлайн конференцияда айтылды.
«Ұстаздармен бірнеше онлайн кездесу өткіздім. Сонда қашықтан оқыту туралы ұсыныстар түсіп жатыр. Біз ол ұсыныстармен келісіп, сабақты онлайн өткізуді тоқтату керек деген шешімге келдік. Мен айтқан платформалармен жұмыс істеудің бірнеше тиімді жағы бар. Бұл жүйе бойынша әртүрлі сұрақтар туындайтын болады», - дейді Білім және ғылым министрі Асхат Аймағамбетов.
Оның айтуынша, қазіргі уақытта барлық тексеру тоқтатылды.
«Қазіргі кезде мұғалімдерден, мектептерден жиналатын есептер көп болып кетті. Бұл есептерді тоқтату туралы бұйрық шығардық. Ешқандай мұғалімнен сынып журналынан басқа ешқандай есеп талап етілмеуі керек деген шешім қабылдадық. Қазіргі жағдайды өздеріңіз білесіздер, сондықтан бүгінгі күні балаларымызға, ұстаздарымызға, әріптестерімізге сенуіміз керек. Кейбір жерлерде өткізіп жатқан сабақтың скриншотын талап етеді, кейбір жерде өткізген сабақты видеоға түсіріп алуды талап етеді. Осындай келеңсіз жағдайларға көзіміз жетіп отыр. Мұндай нәрсеге жол бермейміз, сондықтан ешқандай есептер қажет емес. Өңірлерде бақылау басқармалары бар, ол департаменттерге де осындай тапсырма берді. Енді олар тексеріс жүргізбек түгілі, ұстаздардан есепті талап етпеу мәселесін қадағалап отыратын болады. Біз үйренген дәстүрлі оқу кестесі де болмайды. Бала тапсырманы өзіне ыңғайлы уақытта орындайды. Ең бастысы – бізге нәтиже керек. Ол нәтижені біз жинақтық бақылауда көріп отырамыз. Жалпы балаларымызға сеніп, қолдауымыз керек», - дейді Білім және ғылым министрі Асхат Аймағамбетов.
