Қызылорда облысы Шиелі ауданы Төңкеріс ауылы карантинге жабылды. Аймақта соңғы күндері анықталған науқастардың екеуі – осы елді мекеннің тұрғындары. Қазір ауылға кіреберіс жолдарға блок-бекет қойылып, залалсыздандыру жұмыстары басталды. Бірінші кезекте науқастардың үйі, ауласы және көше бойы дезинфекцияланады. Науқастармен қарым-қатынаста болған азаматтардың барлығы оқшауланды. Айта кетейік, Қызылорда өңірінде коронавирус жұқтырғандар саны 31-ге жетті. Соңғы анықталған 3 адамның екеуі жоғарыда айтқан Шиелі аумағынан болса, біреуі – Қармақшы ауданының тұрғыны. Облыста коронавирус жұқтырған азаматтармен қарым-қатынаста болған 740 адам анықталған. Оның 254-і карантинде, 486-сы үй жағдайында бақылауда. Еске сала кетейік, бұған дейін Төңкеріс ауылының әкімі төтенше жағдай кезінде тойға барғаны үшін қызметінен кеткенін жазған болатынбыз.