Бүгінде еліміздегі соғыс ардагерлеріне ерекше құрмет көрсетіліп келеді. Осы орайда Nur Otan партиясы Түркістан облыстық филиалы «Ардагерлерді ардақтайық» жобасы аясында акция ұйымдастырды.
Шара барысында партия ұжымы 8 ардагердің үйіне барып, медицина өкілдерімен бірге олардың шаңырақтарын аралап, хал-жағдайын біліп, медициналық тексерістен өткізіп, үй шаруасына жәрдемдесті.
Партиялықтар алдымен Ұлы Отан соғысының ардагері Әбжаппар Дайрабайұлының шаңырағында болып, әңгімесін тыңдап, батасын алды.
– Қазіргі жастарға көп еңбектеніңдер, ізденіңдер, үлкендерді сыйлаңдар деп айтып отырамын. Себебі ата-анасын қадірлемеген, үлкендерді сыйламаған ұрпақтың ертеңгі болашағы жоқ. Осы орайда, ардагерлерді құрметтеп, сыйлап, әрдайым көмек қолын созып жүретін партиялықтар мен дәрігерлерге ризашылығымды білдіргім келеді, – дейді ардагер.
Айта кету керек, жалпы Түркістан облысында Екінші дүниежүзілік соғысқа қатысқан 60 ардагер болса, 9509 тыл ардагері бар. Бүгінде сол ардагерлерге тиісті орындар тарапынан қажетті әлеуметтік көмектер мен басқа да оларға қажетті жағдай жасау басты жоспарда тұр.
Nur Otan партиясы Түркістан облыстық филиалы төрағасының орынбасары Қалыйма Жантөреева қазыналы қарияларға ізгі тілегін білдірді.
– Партия тек 9 мамыр – Жеңіс күнінде ғана емес, тұрақты түрде «Ардагерлерді ардақтайық» жобасы арқылы ардагерлердің үйлеріне барып, оларға жәрдемдесіп отырады. Бүгін біз Түркістан қаласындағы 8 ардагердің үйіне арнайы бардық. Денсаулығын қарап, қажетті дәрі-дәрмектерін алып беріп, үй шаруасына қолғабыс жасадық. Қариялардың батасын алдық. Игілікті іс-шара аудандарда да жалғасып жатыр, – дейді төраға орынбасары.
Түркістан облысы