Биылғы жыл қазақ халқын дүр сілкіндірген жеңіспен басталды. «Жүйрік ат, қыран бүркіт» десе, ішкен асын жерге қоятын қазақты Дубайда өткен жарыста шашасына шаң жуытпаған Кабирханның жеңісі қуантты.

Күні кеше батысқазақстандық атбегі Тілек Мұхамбетжановтың Кабирхан атты сәйгүлігі Бірікке Араб Әмірліктерінде, яғни Дубай­дағы атақты «Мейдан» иппо­дромын­да өткен бәйгеден әлемдік жарыста топ жарып, бас жүлдені иеленді.