«Самұрық-Қазына» ұлттық әл-ауқат қорының басқарма төрағасы Ахметжан Есімов акцияларды орналастыру бойынша «Астана» халықаралық қаржы орталығымен ынтымақтастықты дамытуға ниетті. Бұл туралы ол АХҚО басшысы Қайрат Келімбетовпен кездесу барысында мәлімдеді.
Ахметжан Есімов 2020 жылға арналған жекешелендіру бағдарламасы аясында «Эйр Астана», «ҚазМұнайГаз», «Қазақтелеком» сияқты ірі портфельдік компанияларды IPO/SPO-ға шығару екі мекеменің бірлескен міндеті екенін атап өтті. Осы міндет орындалғаннан кейін «Самұрық-Қазына» қорын жекешелендіру бағдарламасында «Қазақстан темір жолы» ұлттық тасымалдаушысын 2023 жылы IPO-ға шығару жөніндегі тармақ қана қалады.
«Самұрық-Қазына» қорының басшысы қазақстандық трейдерлер үшін жаңа мүмкіндіктерге жол ашатын отандық қаржы алаңының артықшылығын айтты.
– Былтыр «Қазатомөнеркәсіп» компаниясы сатқан акциялардың 85 пайызын Лондон биржасына, 15 пайызын АХҚО биржасына орналастырдық. Биыл акциялардың жартысынан көбін АХҚО-ға қойдық, – деді Ахметжан Есімов.
АХҚО басшысы Қайрат Келімбетов «Самұрық-Қазына» қорымен арадағы ынтымақтастықтан зор нәтиже шығарына сенім білдірді.
– Қаржы орталығы құрылғалы «Самұрық-Қазына» мен АХҚО тұрақты түрде тонның ішкі бауындай ынтымақтасып келеді. Қазірдің өзінде AIX алаңында «Қазатомөнеркәсіп» акциялары жақсы орналастырылды. Бұл «Самұрық-Қазынаға» акционерлік капитал тартуға да, биржаның мүмкіндіктерін көрсетуге де көмектесті. Біз 2020 жылы «Самұрық-Қазына» мен АХҚО-ның серіктестігін жаңа деңгейге көтеруді жоспарлап отырмыз, – деді Қайрат Келімбетов.
Еркебұлан НҰРЕКЕШ