Соңғы аптада ақпарат құралдарында шымкенттік цирк ұжымы аңдардан бас тартыпты деген әңгіме желдей есті. Біз осынау ақпараттың қаншалықты шындыққа жанасатынын «Шымкент-цирк» мекемесі директорының міндетін атқарушы Нұрлан Әділхановтан сұраған болатынбыз.
Цирк ұжымына жуырда ғана келген басшы бұл ақпараттың бұрмаланып кеткенін айтады. Оның сөзіне қарағанда, Шымкент циркінің жұмыс жоспарын жаңарту мақсатында ақпараттық коммуникациялар орталығында өткен брифингте «Аңсыз цирк» бірегей эксперименталдық жобасының ұйымдастырылып жатқаны айтылған. Директордың айтуынша, елдегі карантин жағдайына байланысты санитарлық нормаларды сақтай отырып, наурыз айында эксперимент ретінде бір жарым сағаттық «Наурыз думан» атты жаңа қойылым ұйымдастыру жоспарланып отыр. Яғни, наурыз айында басталатын осынау бағдарламада жануарсыз, әртістердің шеберлігіне сүйене отырып, қазіргі замандағы түрлі арнайы эффектілерді, LED экрандарды, декорация-бутафор, арнайы реквизиттерді пайдалана отырып жасалады. Жаңа эстетикалық қойылым туралы бастаманы брифингке қатысқан цирк саласының мамандары да қолдады. «Қойылым күш атасы Қажымұқан Мұңайтпасовтың 150 жылдығына да орайластырылмақ. Көрерменге канадалық «Дю Солей» циркінің үздік әдістемелерін пайдаланып, ұлттық колоритті сақтап, жаңа қойылым дайындауға кірістік. Жалпы,бұл аңдарсыз да өткізіп көрейік деген эксперимент. Алайда аттарды пайдалануымыз мүмкін. Қосымша аңдармен де жаттығу шаралары жүруде. Балаларды қорғау күніне орай аңдармен өтетін арнайы бағдарлама жасалады. Біз аңдардан бас тартпаймыз. Шымкент циркінің меншігінде 6 ат, 3 пони және 2 арыстан бар», – дейді Нұрлан Ыдырысұлы. Шымкент-цирк сонымен бірге биыл Қазақстанды жылжымалы шапито циркімен гастрольдік іссапарға шықпақшы. Shymkent circus – ZOO бағдарламасымен цирк меншігіндегі аң-жануарларды біріктіріп, балаларға арналған жаңа бағдарлама ұсынбақ. Гастрольдік іссапардан оралатын мерзімінде цирк ғимаратындағы аңдар тұратын жайларды, қораларды, торларды жөндеп, ыңғайлы жай жасауды да жоспарлауда. Бүгінде мұндағы жануарлардың жағдайы, күтімі жақсы. Жұмысшы топ өз міндеттерін атқарып жүр. Жануарларды үйретуші Жанат Қалметова манеждегі арыстандар Лео мен Симбаны 3 айлығынан бастап асыраған. Олар бүгінде бір-біріне қатты бауыр басқан.Назгүл НАЗАРБЕК, Шымкент қаласы