Жаңа жылды қарсы алуға қызу дайындалатын елдердің қатарында Қазақстан да бар. Дәл осы мереке қарсаңында туған-туыс пен дос-жаранға сыйлық аларда мәрттігімізде шек болмайды. Сөйтетіндей бұл мерекенің не сиқыры бар? Биыл отандастарымыз Жаңа жылды атап өту үшін қанша қаржы жұмсамақ?
Жаңа жыл жақындағалы еліміздің сауда нүктелері халық нөпірінен аяқ алып жүргісіз. Бүкіл ел дүкен аралап кеткендей. Оларды қызықтыру үшін сауда нүктелері түрлі іс-шаралар ұйымдастырып үлгерген, қай сауда орны тартымды – клиент соған ағылады. 2016 жылы ranking.kz агенттігі қазақстандықтардың Жаңа жылға дайындық үшін 1 триллион теңгеге жуық қаржы жұмсағанын жазған-ды. Одан бері өткен 3 жылда бұл сома көбеймесе, азаймайтыны белгілі. Жаңа жыл дайындығына қаржы аямайтындардың басым бөлігі Алматы мен Нұр-Сұлтан қаласында тұрады. Алматылықтар 3 жыл бұрын Жаңа жылда 243 млрд, ал астаналықтар 110 млрд теңге жұмсаған болса, үшінші орынды ШҚО 100 млрд теңгемен қорытқан екен. Аталған агенттік қалада тұратын қазақстандықтардың әрқайсысы Жаңа жыл үшін 91 мың теңге жұмсайтынын есептеп шығарған еді. Ал биыл астаналықтар тек сыйлық үшін орта есеппен 150 мың теңгеден астам қаржы жұмсағанын айтып отыр. Бірақ олар есімін жария етпеуді өтінді. Ал Тараз қаласының тұрғыны Жанна Әмірхан Жаңа жылды атап өту, дастарқан жаю мен жақындарға сыйлық жасауға оңтүстік өңірде, шамамен 45-50 мың теңге жұмсалатынын айтады.
«Дастарқанға міндетті түрде ет асамын, бауырсақ пісіремін, тауықтың етінен чикен дайындап, балық пісіремін. Үш түрлі салат дайындаймын, бірақ арасында «оливье» жоқ. «Жаңа жылды қалай қарсы алсаң, жылды солай өткізесің» деген түсінік бала кезімізден санамызға сіңіп кеткен ұрпақпыз ғой, бір жағынан ертеңге деген сеніммен өмір сүру, жақсылық күту, үміт үзбеу де жақсы қасиет деп ойлаймын. Сондықтан бұл күні барымды салып дайындаламын. Жаңа жыл əәр отбасыға жақсылық əкелсін!», – дейді ол.
Ал астаналық кәсіпкер әрі суретші Аңсаған Мұстафа бұл мерекені бала кезден асыға күтетінін айтады. Себебі әкесінің сағат тілі түнгі он екіге жақындағанда есікті қағып, шырылдатып, ашып-жауып, Сантаға рақметін айтып, сыйлықтарын беріп қуанту дәстүрі бар екен. «Өсе келе Сантаны көргіміз келіп інім екеуміз аңдуға көштік. Інім терезеден аулаға қараса, мен үй артындағы терезеге үңілетін ем, бірақ анам да бұл ойында әкеме көмектесіп, бізді тамаққа шақыра қояды, сол кезде Санта сыйлығын әкеме «беріп кетіп жүріпті». Сол кездерді бүгінде сағына еске аламын. Бүгіндері балаларымды мен де солай құттықтаймын. Сенеді. Өткен жылы Сұлташ алдыңғы жылы көрмей қалдым, терезе көп, бәрін қадағалау мүмкін емес деп, бәріміздің телефонымызды жинап алып, терезеге қаратып, видео түсіретін қылып, оны теледидарға қосып, өзі қарап жатты. Бізге енді не істер екенсіңдер деп қуланып қояды. Бала көп, үйге кіргізіп үлгермей есік алдына қалдырып кетіпті, тезірек барып алмасаң, басқа бала алып кетеді деп құтылдық. Биыл жасы 12-де, сенген балаға сыйлық бар, сенбегенге сыйлық жоқ деп ем, сенем-сенем деп, тапсырыс берген құлаққабын күтіп жүр. Енді алданып жүрген Байжігіт қана, шын сенеді. Екі апта бұрын терезеден айқайлап сұраған ойыншықтары бар, соны күтіп жүр. Сатып алып қойдық. Балалардың сыйлығына 20 мың теңге жұмсалды. Өзім Жаңа жылды жақсы көремін, есейіп кетсем де ғажайыптар күтемін», – дейді суретші.
Қарағандылық көпбалалы ана Сандуғаш Хасенова да ғажайыпқа сенушілер қатарынан болып шықты. «Анам ет асып қоятын, ата-анамыз төрде отырады, ағам Аяз ата, Ақшақар жылда ауысады. Бәріміз Жаңа жыл кіретін уақытты күтуге дайындаламыз. Дастарқан жасаймыз, үйде қанша қыз-келін бар, сонша салат пен торт түрі болады. Елбасының құттықтауын күтеміз. Содан соң Жаңа жылды біздің үйде қарсы алуға келген туған-туысқан мен көршілерді аралаймыз. Әкем 80-ге келгенше көршілердің дастарқанынан дәм татты. Соңғы жылдары денсаулығы сыр берген соң, сендер барыңдар, ұят болады, тосып отыр ғой деп бізді мазалайтын... Сондықтан да Жаңа жыл мен үшін ең керемет мереке. Жаңа жылдың жақсылығына сену керек», – дейді.
Оралдық Әлфия Шамаева Жаңа жыл ғана емес, барлық мерекеде жанына жақын жандарға сыйлық жасауды әдетіне айналдырған. Ол үшін көлемі мен бағасы маңызды емес. «Мен үшін жақындарымның көңіл күйі маңызды! Қанша қаржы жұмсалса да ысырап деп ойламаймын, бұл – бір-бірімізге көңіл бөлу мүмкіндігі. Бүгінгі таңда дәл осылай көңіл бөлу қат болып кетті. Мен үшін сыйлық алған адамның қуанышынан асқан қымбат сәт жоқ», – дейді.
Ал блогер Алмас Тоқбаев Жаңа жылдың шығынын «0» теңге деп бағалады. «Себебі 1 қаңтар анамның туған күні, мерекенің барлық қызығы сол күні болады. Адамды алға жетелейтін үміт, жыл ауысқанда бағалы сыйлық берсек алдағы жыл да солай көңілді болады деген үміт қолды ашып жібереді. Ал бұл мерекенің сиқыры сол, сіз түнде ұйықтап, таңертең оянғанда жаңа күнді емес, Жаңа жылды қарсы аласыз. Жаңа күнпарақ. Жаңа цифр. Барлық магия осында», – дейді ол.
Ал сіз қанша қаржы жұмсайсыз?
Айдана БЕГІМ