Қарағанды облысында «Казино» жедел алдын алу іс-шаралары барысында 16 ойын мекемесінің заңсыз қызметінің жолы кесілді. Теміртауда алкоголь өнімдерін өндіретін жерасты цехы жабылды.
Өңірде көлеңкелі экономиканы азайту, бизнесті қорғау және сыбайлас жемқорлыққа қарсы іс-қимыл жөніндегі жол картасы жұмыс істейді. Оның ішінде қылмыстық топтардың Жезқазған және Сәтбаев қалаларындағы қызметі де әшкереленді. Жалған 100 долларлық банкноттарды сату тоқтатылды. Мұнай және мұнай өнімдерінің заңсыз айналымы фактілері бойынша 5 қылмыстық құқықбұзушылық, Нұра ауданындағы «Қараадыр» кен орнында заңсыз өндіру фактісі анықталды. Аймақ басшысы Жеңіс Қасымбек Мемлекет басшысының Үкіметтің кеңейтілген отырысында және реформалар жөніндегі жоғары кеңесте берген тапсырмалардың өңірде қалай орындалатыны туралы хабарлады. Қарағанды облысында өткен жылы Мемлекет басшысының тұрғын үйдің қолжетімділігін арттыру туралы тапсырмасы орындалды. 2020 жылы облыс бойынша кезекте тұрған 1 528 адам пәтер алған. Оның ішінде коммуналдық тұрғын үй қорынан – 897, ипотекалық несиелеу бағдарламасы бойынша – 102, «Қазақстанның тұрғын үй құрылыс жинақ банкі» АҚ желісі бойынша несиелік тұрғын үй – 124, «Бақытты отбасы» бағдарламасы бойынша – 365 және демеушілер есебінен – 40. Өткен жылдан бастап «Шаңырақ» (5-10-20) пилоттық жобасы бойынша тұрғын үй қарыздарын беру басталды – бұл «Нұрлы жер» бағдарламасының жаңа бағыты. Ауыл шаруашылығы өнімдерін өндіру 6,5% өсіммен 429 млрд теңгеге жоспарланып отыр. Агроөнеркәсіптік кешенде 1 459 жұмыс орнын құратын 36 инвестициялық жобаны іске асыру белгіленген. Мемлекет басшысының тапсырмаларын орындау үшін облыста жедел әрекет ету және тұрақты әлеуметтік-экономикалық жағдайды сақтау бойынша дағдарысқа қарсы жоспар жасалған. 2021 жылы Қарағанды облысында тұрақты жұмыс орындарын құру басым бағыттарға айналады. Кәсіпкерлікті қолдау жалғасады. «Бастау Бизнес» курстарында 2021 жылы 1 500 адамды оқыту жоспарлануда. 2 500-ден астам жұмыс орнын құратын 2 мыңнан астам жобаны іске асыруға қаражат қарастырылған. «Еңбек» және «Жұмыспен қамту жол картасы» бағдарламалары бойынша қарастырылған шараларда 36,5 мың адамды қамту жоспарланды. Жұмыспен қамтудың жол картасы бойынша биыл отандық тауарлар өндірумен және қызметтер көрсетумен айналысатын кәсіпкерлерге қолдау көрсетіледі. – Өткен жылы жұмыспен қамту бағдарламаларымен 50 мыңнан астам адам қамтылды. 30 мыңға жуық жаңа жұмыс орны құрылды, оның ішінде 19 575 тұрақты жұмыс орны. Қазір еңбек нарығындағы жағдай тұрақты. Биыл құрылыс және тұрақты жұмыс орындарын құру басымдыққа ие. Сондай-ақ ЖҚЖК аясында несие беру арқылы кәсіпкерлік субъектілеріне қолдау көрсетіледі. Қазір жұмысты бастау керек, – деп атап өтті Жеңіс Қасымбек. Соңғы 5 жылда әлеуметтік қорғау саласын қаржыландыру 3,5 есеге артты. Сондай-ақ әлеуметтік қорғау жүйесіндегі басым мәселенің бірі – мүгедек адамдардың өмір сүру сапасын жақсарту. Қазір өңірде 67 мыңнан астам мүмкіндігі шектеулі азамат тұрады. Әлеуметтік қызметтер порталы арқылы 2021 жылы олар ОТҚ-ның 55 түрімен және қызметтермен қамтамасыз етіледі. Енді мүгедектігі бар адамдар өздерінің жеке қажеттіліктеріне қарай техникалық құралдар мен оңалтуды өз бетінше таңдай алады. Өңір бойынша ашық фронт-кеңселер жұмысын жалғастырады. Мысалы, Open Karaganda қызметкерлері 4 351 тұрғынның мәселесін шешуге көмектесті. Негізгі жаңалықтардың бірі – «Е-Өтініш» пилоттық жобасын іске қосу. Жүйе халықпен кері байланысты жылдам әрі тиімді қолдауға мүмкіндік береді. Қарағанды облысында қолма-қол ақшасыз төлемдер саны 3,7 есеге артты. Екі жылдың қорытындысы бойынша заңды тұлғалардың ақшалай қаражатты қолма-қол ақшаға айналдыру көлемі төмендеді. Бизнес-ахуалды жақсарту үшін жағдай жасалуда. 2020 жылы 3,7 мыңға жуық бизнес-жоба қаржылық қолдауға ие болды, 2,6 мың адам оқытылды. Дағдарысқа қарсы шаралар аясында 30 мыңнан астам кәсіпкердің салығы, екінші деңгейлі банктердің несиелері және жалдау ақысы бойынша төлемдері кейінге қалдырылды.
Қарағанды облысында 1 ақпаннан бастап мектептерде 1-2-сынып оқушылары тегін тамақтана бастады. Инклюзивті білімге ерекше назар аударылмақ. Қарағанды, Теміртау, Балқаш қалаларында және Шет ауданында 10 инклюзивті топ ашу жоспарланып отыр. Сонымен қатар облыс орталығында тағы бір психологиялық-медициналық-педагогикалық кеңес беру және Қарағанды мен Сәтбаевта екі түзету кабинеті жұмыс істей бастайды. Биыл облыста 1 500 орынға шақталған 15 жекеменшік мектепке дейінгі ұйым ашылмақ. Айта кету керек, мектепке дейінгі мекемелердің сапасын енді онлайн бағалауға болады. «Индиго» платформасында кез келген ата-ана тамақтану, педагогтің біліктілігі және тағы басқа негізгі көрсеткіштер бойынша балабақшаға баға бере алады.
Алдағы 3 жылда Қарағанды облысында 7 денсаулық сақтау нысаны салынады. Олардың ішінде биыл Қарағандыдағы облыстық көпбейінді балалар ауруханасының, Майқұдық және Сұрыптау шағынаудандарында жедел медициналық жәрдем стансасының құрылысын аяқтау көзделген. Ауылдарда фельдшерлік-акушерлік пункттерге деген жоғары қажеттілік әлі де бар. 2 жыл ішінде ФАП-пен 31 елді мекенді қамту жоспарланған. Биыл «Ауыл – ел бесігі» бағдарламасы бойынша Нұра ауданының Кертінді ауылында фельдшерлік-акушерлік пункт салынады.
Облыс медициналық кадрлармен қамтамасыз етудің жоғары пайызын көрсетіп отыр. Биыл медициналық оқу орындарының 357 түлегі өңірде қалды. Дәрігерлерді тұрғын үймен қамтамасыз ету бағдарламасы жалғасады. Алдағы 2 жылда 300-ге жуық пәтер бөлінеді. Облыста «жасыл» энергетика дамып келеді. Балқашта жаңа күн электр стансасын іске қосу жоспарлануда. Саран мен Ағадырдағы қосымша күн қуаты мәселесі шешілуде.
Биыл облыста 2022 жылы іске қосылатын 6 ірі жоба іске қосылады. Аграрлық салада 20 инвестициялық жобаны іске асыру жоспарланып отыр. Өңірде мал шаруашылығы дамыған. Ет және сүт өндіретін жаңа фермалар ашылады деп күтілуде.
Оның айтуынша, биыл ауыл-шаруашылық өнімінің 6,5%-ға өсуі жоспарланған. Өткен жылы облыста 151,1 мың тонна ет, 502,6 мың тонна сүт, 664 млн дана жұмыртқа өндірілді. 2020 жылдың қорытындысы бойынша ауыл шаруашылығының жалпы өнім көлемі 5,7%-ға артып, 398,7 млрд теңгені құрады. 2021 жылы АӨК-де еңбек өнімділігін 17,5%-ға өсумен 4591,3 мың теңгеге дейін арттыруға және өңделген өнім экспортын 20%-ға ұлғайтуға бағытталған шаралар кешені іске асырылады.
Мал шаруашылығында асылтұқымды малдың үлесін ұлғайту ынталандырылады. «Сыбаға» бағдарламасы бойынша 10 мың бас ірі қара және 20 мың ұсақ мал сатып алынады деп күтілуде. Ауыл шаруашылығы жануарларына арналған азық құнын арзандатуға 714 млн теңге бөлінді.
Қарағанды облысының ауылдарын «Ауыл – ел бесігі» бағдарламасы бойынша дамыту жалғастырылады. Биыл Осакаровка, Абай, Ақтоғай, Бұқар жырау, Қарқаралы, Нұра және Шет аудандарындағы 11 ауылдық елді мекенге көңіл бөлінеді. Олар әлеуметтік, құрылыс және ТКШ салаларында 19 жобаны іске асыруды көздеп отыр. Жалпы жолдарға келетін болсақ, «Ауыл – ел бесігі» бағдарламасы бойынша облыстың 3 ауданында 35 шақырым ауыл-ішілік жолдар жөнделеді. Мемлекеттік бағдарлама 2027 жылға дейін есептелген. Облыстың барлық тірек және серіктес ауылдарын қамту міндеті тұр.
– Биыл барлық ауданды қамту қажет. Біз жобаның арқасында ауылдардың инфрақұрылымы жақсарып, тірек және серіктес ауылдарда тұратын ауыл тұрғындарының кәсіпкерлік белсенділігі артып, тұрақты жұмыс орындарын құруды қамтамасыз ететінін көріп отырмыз, – деп атап өтті Жеңіс Қасымбек.
Өткен жылдың қорытындысы бойынша «Ауыл – ел бесігі» арнайы жобасы аясында 47 жоба бойынша жұмыс жүргізілді. 2020 жылы бұл бағдарламаны қаржыландыру 4 еседен астам ұлғайды. 9 жалпы білім беретін мектеп пен 1 спорт мектебі жөнделді, 2 аудандық аурухана мен дәрігерлік амбулатория ғимараты жөнделді. 25 шақырым су құбыры желілері қайта жаңартылды. 70 шақырым кентішілік жолдарға жөндеу жұмыстары жүргізілді.
Ләззат ҚОЖАХМЕТ, Қарағанды облысы