10 ақпан күні Қ.Мұңайтпасұлы атындағы олимпиада резервінің мамандандырылған республикалық мектеп-интернат-колледжінде даңқты қазақ балуаны Қажымұқан Мұңайтпасұлының 150 жылдығын тойлауға арналған салтанатты шара өтті.
Кездесудің ашылуында сөз сөйлеген Мәдениет және спорт министрі Ақтоты Райымқұлова Қажымұқан Мұңайтпасұлының мерейтойын министрлік республикалық деңгейде атап өтуге дайындалып жатқанын айтты. «Қажымұқан атамыз – бар ғұмырын күрес өнеріне арнап, көзі тірісінде аңызға айналған азамат. Кей деректерге сенсек, балуан бабамыз күрестің бірнеше түрінен 54 мемлекетте күресіп, 48 медаль олжалаған. Сонымен қатар Қажымұқан Мұңайтпасұлы ел есінде бозкілем төріндегі балуандығымен қатар домбыра шертіп, ән салған сегіз қырлы, бір сырлы тұлға ретінде қалған. Батыр бабамыздың 150 жылдығы осы жылы республика аумағында атап өтіледі», – деді министр. Шара аясында белгілі спортшы Сергей Цырульников, Тимур Сыпатаев секілді елімізге танымал зор күш иелері көпшілікке өнерін көрсетті. Өз кезегінде Сергей Цырульников өткен ғасыр палуандарының мұрасын жаңғырту маңызына тоқталды. «Басты мақсат – өскелең ұрпақтың бойына ата-бабаларымыз аманаттап кеткен қасиеттерді сіңіру. Ата-бабамыздың мұрасын жаңғыртып, соның негізінде жастарды тәрбиелеуге болады. Сонымен қатар елімізде бұқаралық және балалар-жасөспірімдер спортына аса мән беру маңызды. Сол жерден болашақ чемпиондар шығады. Министрліктің қолдауымен мен де осы бағытты дамытуды жоспарлап отырмын», – деді Сергей Цырульников. Шара кезінде санитарлық-эпидемиологиялық талаптар қатаң сақталды.Айша ЕРСҰЛТАН