Елімізде 2023 жылы биатлоннан жасөспірімдер арасындағы әлем чемпионаты өтеді. Бұл құнын білгенге таптырмас мүмкіндік. Өйткені IBU техникалық комитеті мен басқарма мүшелері кез келген елге мұндай міндет жүктемейді.
Спорт әлемі пандемиядан кейін қайта түлеуге дайындалып жатыр. Мәселен, Денешынықтыру және спорт комитеті таратқан ақпаратта IBU техникалық комитеті мен басқарма мүшелері арнайы отырыс өткізгені жазылған. Атап айтқанда, алдағы жылдарға арналған жарыс кестесі түзілген. Атқарушы комитет 2022-2024 жылдары өтетін әлем кубогы, IBU кубогы, Еуропаның ашық чемпионаттары, жасөспірімдер кубогы Жастар мен жасөспірімдер арасындағы әлем чемпионатын өтетін аумақты белгілеген. Осылайша, биатлоннан жасөспірімдер арасындағы әлем чемпионаты 2023 жылы 4-12 наурыз аралығында Қазақстанда өтеді. 8 күнге ұласатын жарыстың өтетін орны – Щучинск қаласы.Айбике ЖАНАСЫЛ