Қызылорда қаласы Шәкір Тәжібаев атындағы көше тұрғындары ұзақ жылдан бері жолдың жөндеу көрмегеніне наразы. Мұндағы жұрт күн жылыса болды, ми батпақтан көз ашпайтынын айтады.
Бұл көше қала орталығында болғанымен, мұнда жаяу адам тұрмақ, көліктің де қатынауы мұң болып тұр. Бір күн жауған жаңбыр мен еріген қардың зардабын жылда татып жүрген тұрғындар осы мәселені көтеріп қақпаған есігі, бармаған жері қалмаған. Алайда «баяғы жартас, сол жартас» күйінде қолып отыр. «Осы көшеге 1994 жылы көшіп келдім. Содан бері көше азабын татып келеміз. Көшені қазып, табиғи газ құрылысын жүргізді. Бірақ оны бізге қоспады. Кейіннен өзіміз ақша жинап, газ құбырын тартқыздық. Оны 2006 жылы қосып берді. Кезінде ауызсуды да көшеге өзіміз әкелдік. Қолдан келгенін өз күшімізбен ұйымдасып, жасадық. Енді асфальт төсеу, канализация тарту қолымыздан келмейді. Әу баста осы көшені абаттандырамыз деп уәдені үйіп-төкті. Бірақ орындалмады. Тұрғындардың көбі зейнет жасындағы қарт кісілер болғандықтан, жүріп-тұруы қиын. Қашан жер кепкенше көше батпақтан көз ашпайды. Мұндайда батпаққа батамыз деп такси келмейді. Тіпті, қаланың ортасында тұрамыз деп айтуға ұяласың. Бұл көшеде бар-жоғы 10-12 үй орналасқан. Қызылорда қаласының тұрғын үй-коммуналдық шаруашылығы, жолаушылар көлігі, автомобиль жолдары және тұрғын үй инспекциясы бөліміне арыз жаздық. Былтыр қала әкімі Нұрлыбек Нәлібаевқа кіріп, мән-жайды түсіндірдім. Биылдан қалмай жөнделетінін айтып, қарамағындағыларға тапсырма берді. Одан бері бір жыл өтті, асфальт әлі жоқ», – дейді көше тұрғыны Мамрайхан Тұрсынқожаев.
Бұл көшеде Ұлы Отан соғысының ардагері Шәкір Тәжібаев тұрған екен. Отты жылдарда қару асынып, Отанын жаудан азат еткен жауынгер Ш.Тәжібаев майдан даласында Кеңес Одағының Батыры Мәншүк Мәметованың рота командирі, гвардия капитаны болыпты. Невель қаласының «құрметті азаматы» деген атағы тағы бар. Соғыстан келіп, ұзақ жылдар бойы басшылық қызметтер атқарған жауынгер Сыр елінің өркендеуіне сүбелі үлес қосқаны тарихтан белгілі. Майдангер батыр атамыздың есімімен аталатын бұл көше айтарлықтай ұзын емес, ені де шағын. Алайда тұрғындарының базынасы жылда ескерусіз қалады деп ашынған мүмкіндігі шектеулі жан Шолпан Мамыкова батпақ күні жедел жәрдем қызметінің келуі де қиын екенін алға тартады.
«Өзім мүмкіндігі шектеулі жанмын. Мынадай батпақта жедел жәрдем шақыру қиын. Емханаға баруға аяғым ауырады. Бұл жерде тұратындардың көбі мүгедек жандар мен зейнеткерлер. Осы жолды жөндеп берсе дейміз», – деді 66 жастағы тұрғын.
Олардың бұл мәселені көтеріп отырғанына бірнеше жылдың жүзі болды. Тұрғындардың айтуынша, жаңбыр жауған кезде көшеден аяқ алып жүрудің өзі қиямет. Салдарынан көлік қатынасы қиындайтын көрінеді. Оның үстіне, көшедегі жарықтың жоқтығы да жағдайды қиындата түскен. Бұл жағдайдан қала әкімдігі де хабардар. Өткен жылы бірнеше көшеге жөндеу жұмыстары жүргізілгенімен, дәл осы орталықтағы көше тізімнен шет қалған. Ал мамандардың сөзінше, аталған жолды жөндеу жұмыстары биыл қайта қолға алынбақ.
«Ш.Тәжібаев көшесіне өткен жылы жобалық-сметалық құжаттары әзірленіп, жол жөндеу жұмыстарын жүргізу үшін мемлекеттік сатып алу конкурсы өткізілді. Нәтижесінде, конкурсқа қатыспау салдарынан жеңімпаз анықталмады. Осы көшеде жол жөндеу жұмыстарын жүргізу үшін биыл қайта тізімге енгізілетін болады», – дейді Қызылорда қаласының тұрғын үй-коммуналдық шаруашылығы, жолаушылар көлігі, автомобиль жолдары және тұрғын үй инспекциясы бөлімінің маманы Мереке Серікболқызы.
Айта кетейік, Қызылорда қаласында өткен жылы республикалық және жергілікті бюджет есебінен 408 көшеге орташа және күрделі жөндеу жұмыстары жүргізілген. Бұл жұмыстар биыл да жалғасын табары сөзсіз. Тұрғындар майдангер атындағы көше енді биыл жанданады деген үмітте. Ал біз әзірге мұны уақыт еншісіне қалдырдық...
Нұрсұлтан ҚАЗБЕКОВ, Қызылорда облысы