Биыл Абай Құнанбаевтың 175 жылдығына орай 500-ден астам шара өтеді. Бұл жайында Қазақстан Президенті Қасым-Жомарт Тоқаев «Абай және ХХІ ғасырдағы Қазақстан» мақаласында жариялады.
– Біз ұлттық сананы жаңғыртамыз және бәсекеге қабілетті ұлт қалыптастырамыз десек, Абайдың шығармаларын мұқият оқуымыз керек. Оның қоғамдағы түрлі үдерістерге қатысты көзқарасы бүгінгі Қазақстан үшін аса пайдалы. Өз заманының ғана емес, қазіргі қоғамның да бейнесін танытқан Абай – елдік мұраттың айнымас темірқазығы. Әр қазақтың төрінде Абайдың кітабы мен Мұхтар Әуезовтің «Абай жолы» романы тұруы керек деп санаймын. Келер ұрпақ Абайдың сара жолын жалғауы тиіс. Бұл – ұлы ақын арманының орындалуы. Сондықтан біз Абайдың ойынан да, тойынан да тағылым алуға тиіспіз, – деді Қасым-Жомарт Тоқаев.
Соның басты шарасы тамыз айында Семейде ЮНЕСКО-мен бірлесіп өтетін «Абай мұрасы және әлемдік руханият» атты халықаралық ғылыми-практикалық конференция болады. Ал қазан айында Нұр-Сұлтанда «Абай және рухани жаңғыру мәселелері» атты халықаралық конференция өтеді. Оның арасындағы тағы бір жоба – Абай шығармаларын 10 тілге аударып, кітаптарын шығару. Атап айтқанда, Абай еңбектері ағылшын, араб, жапон, испан, итальян, қытай, неміс, орыс, түрік, француз тілдеріне тәржімаланады. Оған қоса, ақынның өмірі туралы бірнеше деректі фильм мен телехикая түсіріледі.
Театр және музыка фестивальдері бүкіл елде өтеді. Ең жақсы әдебиет және өнер туындылары үшін сыйлыққа Абай есімі беріледі. Ақын тойынан өнер саласы да тыс қалмайды. Абайдың тұлғасы мен мұрасын ұлықтау шетелдерде де жалғасады. Ресейдегі, Франциядағы, Ұлыбританиядағы және басқа да мемлекеттердегі Қазақстан елшіліктері жанынан «Абай орталықтарын» құру жоспарланып отыр.
Президенттің айтуынша, Семей қаласы еліміздің рухани дамуында ерекше орын алады және тарихи орталыққа айналуы керек. Әлеуметтік-экономикалық кешенді дамыту және мәдени нысандарды жаңарту қажет екенін жеткізді. Соған байланысты Абай мұражайы үшін Жидебай трактатында жаңа ғимарат салынады. Оған қоса, Абайдың «Жидебай-Бөрілі» мемлекеттік тарихи-мәдени және әдеби-мемориалдық қорық-музейіне ерекше көңіл бөліп, ғылыми-танымдық жұмыстармен айналысатын орталыққа айналдырмақшы. 1918 жылы Мұхтар Әуезов пен Жүсіпбек Аймауытов негізін қалаған «Абай» журналына мемлекет тарапынан қолдау көрсетілмекші. Бұл басылым 1992 жылдан бері қайта шыға бастаған еді. Сонымен бірге Президент ақынның туған жеріне барғысы келетіндерге барлық жағдайды жасауды тапсырды.
«Ұлы Абайдың құрметіне оның бай мұрасын дәріптейтін ауқымды шаралар өтеді. Қазақстандықтарды осы бастамаға белсенді қатысуға шақырамын», – деп жазды ел Президенті Қасым-Жомарт Тоқаев.