Шымкентте индустриялдық аймақ аумағында үйінді басып қалғандар темір кесуге барған болуы мүмкін. Оған қиранды астынан табылған марқұмдардың көлігі мен құрал-саймандары дәлел,– деп хабарлады "Астана" арнасы.
"Ордабасы" интустриалдық аймағында орналасқан бос ғимараттардың бірінің шатыры сенбі күні опырылып түсті. Төтенше жағдайлар департаментінің құтқарушы жасағы оқиға орнында үш сағаттай жұмыс істеді. Үйінді астында қалғандарды іздестіруге иттің көмегі қажет болды.
Айта кетейік, құлаған бетон астынан үш бірдей ер адамның мәйіті табылды. Ескі ғимарат болғандықтан, құтқарушылардың өзі басын қатерге тігуіне тура келді. Өйткені бетон қабырғалар ауыр темір тіреуіштермен бекітілген екен.
"Алдын ала мәлімет бойынша бір адам сол жерде қарауыл болып жұмыс істеген. Оқыс оқиға ғимараттардың темір бетондарын қырқу кезінде болған деген болжам жасалды. Ол жерде біздің құтқарушылар жұмыс істеген кезде де қауіп төніп тұрды, себебі ол қараусыз қалған ғимарат", – дейді Шымкент қаласы ТЖД жедел құтқару жасағының басшысы Орынбасар Төртбаев.
Қолда бар мәліметтерге сүйенсек, қайтыс болған күзетші индустриалдық аймақта жұмыс істегенмен, дәл оқиға болған күні жұмысқа түспеген көрінеді. Қазір болған жайтқа байланысты полиция тергеу жұмыстарын бастап кетті.
Полиция 22, 29 және 54 жастағы марқұмдардың үшеуі де Шымкент қаласының тұрғыны екенін мәлімдеді. Айғақты зат ретінде автокөлік пен табылған заттар алынып, тиісті сараптама тағайындалды.
