Елімізде биыл бюджеттен көзделген қаражат шеңберінде 200 жаңа мектеп бой көтереді. Кейінгі екі жылда республикада 41 мың оқушыға арналған 126 жекеменшік мектеп ашылды. Бұл бұған дейін ашылған жекеменшік мектептер санынан 2 есе көп.
Білім және ғылым министрлігі әкімдіктермен бірлесіп 800 мектептің құрылысы бойынша Жол карталарын әзірлеп жатыр. Ол үшін 4 механизм қолданылады. Алдымен мемлекеттік-жекеменшік әріптестік арқылы мектеп құрылысы жүреді. Одан кейін жекеменшік мектептер желісін дамыту жоспарда бар. Мемлекеттік бюджеттен нысаналы құрылыс пен модульдік конструкциялардан мектептер салу да негізгі бағыт болмақ. Сондай-ақ 2025 жылға дейін 5 мың мектептің инфрақұрылымы жаңартылады. Осылайша, балаларға қауіпсіз және қолайлы жағдайларды жасап, жоғары жылдамдықты интернетпен, пәндік кабинеттермен қамтамасыз етеді. Мектеп жиһаздары, кітапханалар мен асханалар жаңарып, күрделі және кешенді жөндеу жүргізіледі.А.АЙДАРҚЫЗЫ