Мүйіз демекші, адамға мүйіз ешқашан шықпайды. «Мүйізі қарағайдай ағалар» деп жатады ғой. Бұл да өтірік. Мүйізі қарағайдай болып, көшеде келе жатқан ағаларды көрген емеспін. Мүйіз тек жануарларға ғана шығады емес пе? Мысалы, сиырға, ешкіге, түйеге... Ой, түйеге шықпайды екен ғой. Қасқырға да мүйіз шықпайды. Мүйізді қасқырларды көрсем, көзім шықсын. Негізі, мүйіз туралы көп айта беруге болады. Шынымды айтайын, мүйіз адамға шықпаса да: «Маңдайыңа мүйіз шықты ма, не?» деп теңеп, бейнелеп, әсірелеп айтып жататыны рас қой?
Осы тұрғыдан келгенде, Шығыс Қазақстан облысы, Зайсан ауданының тұрғыны Алмас Тұрғынбайұлына мүйіз шықты!. Неге дейсіз дер ме? Таң қалып отырған боларсыздар? Ее, таң қалудан қалдық қой бүгінде.
Бір күні ол жергілікті қасапханалардың біріне ұрлыққа түсті. Жымқыруға деген иммунитеті күшті. Содан, тоңазытқышты ашып қалса, маралдың 250 килодай мүйізі жатыр екен. Бұл деген қыруар байлық қой? Қара нарықтағы құны 22 миллион теңге!
Ол маңдайының жиырыла қалғанын байқады. Маңдайын ұстап көріп еді, мүйіз шығып келе жатыр екен. Сонда да, тегін олжаға кенелетінін ойлап, мүйіздерді ала кетті. Үйлердің арасымен қашып келеді. Бір кезде, мүйізі сорайып, марал мұйізіне ұқсап кетіпті. Басын көтере алмай қалды.
Содан қорыққан 26 жастағы бозбала тәуіпке келді.
– Апа, мүіз шықты маңдайыма, – деді.
Тәуіп апасы оның мүйізінен ұстап көріп:
– Бірдеңе бүлдіргенсің ғой? –деп сұрады.
– Жооқ, ештеңе, –деп өтірік соқты ол. Тәуіп апасы оның мүйізін аралап тастады. Алмас пайда көрмек болып, оны да ала кетті. Сол күні Алматыға тартты. Мүйіздерін сатып, пайда таппақ. Бірақ, автобуста отырғанда, бір қыз оған қарап күле берді, күле берді.
– Неменеге ыржыңдап күлесіз? –деп сұрады ол.
– Бір түрлі екен.
– Не, маңдай көрмедіңіз бе?
– Маңдайыңызға екі мүйіз қатар шығыпты.
– Қойыңызшы? –деген ол маңдайын алақанымен сипалады. Сол екен, зәресі қалмады. Мүйізді сипалаған сайын өседі. Мүйіз қыздың алдына дейін жетті. Алматылықтар таң қалды. Журналистер де тап бола кетті.
– Мүйізді жігіт!
– Сенцасия! Мүйізді жігіт Алматыда!
– Жемқорларға да осындай мүйіз шықсын!
– Парақорларға да!
– Мүйізділер жасасын! – деп шуласты.
Шын мәнінде дәл осындай оқиға болды деп сеніп қалдыңыздар ма? Өләә, жаман сенгіш екенсіздер ғой? Әшейін, өзімше бейнелеп айтып жатқаным емес пе? Алмас Тұрғымбайұлына мүйіз шықпаса да, ол марал мүйіздерін ұрлағаны үшін, Алматыда ұсталып, тергеу амалдары басталды. Айтайын дегенім, абайлаңыздар, ұрлық жасамаңыздар, сізге де мүйіз шығып кетуі мүмкін ғой? Ойбаай, беті аулақ!
