Қуғын-сүргін құрбандарын толық ақтау 11 бағыт бойынша жүргізілетіні белгілі болды. Мұндай шешім қуғын-сүргін құрбандарын толық ақтау жөніндегі мемлекеттік комиссияның екінші отырысында қабылданған. Сонымен қатар еске алу институтын құру жөнінде де ұсыныс айтылған. Бұл туралы Орталық коммуникациялар қызметіндегі брифингте айтылды.
Неге 11 бағыт екенін вице-премьер Ералы Тоғжанов түсіндіріп, «Оның бағыттары көп: «сотсыз және тергеусіз», «ұжымдастыру кезеңі» және «депортация кезеңі» категориялары бар»... Қазақстанда 26-дан астам лагерь болған. Бұл бағыттарды да зерттеу қажет болады. Лагерьлерде, кейін атылып кеткен қанша адам отырды? Бүгінде нақтылауды қажет ететін бағыттар өте көп. 11 бағыт нақтыланған», – деді. Яғни, саяси қуғын-сүргін көрген азаматтар осы бағыттар бойынша ақталады. Бірақ қуғын-сүргінге ұшырағандардың санаттары қандай да бір этносқа байланыссыз және ескерусіз қаралады. Әрі бұл жұмыспен тек ғалымдар ғана айналыспайды. Оларға адвокаттар да басты назар аударады. Себебі көптеген сұрақ заңдарға қатысты. «Мемлекеттік комиссияның кешегі отырысында Үкіметке еске алу институтын – болашақта осы бағытта жұмыс істейтін арнайы мемлекеттік мекеме құру мүмкіндігін зерттеу және қарастыру ұсынылды, өйткені бұл бір кезеңнің ісі емес. Мемлекеттік комиссия қазір мұның бәрін ашады, көмектеседі, бірақ мұрағаттармен дәйекті жұмыс жалғасуы керек. Бұл мәселе мемлекеттік комиссияның келесі отырысында қаралатын болады», – деді брифингке қатысқан Мәжіліс депутаты Берік Әбдіғалиұлы. Ол сондай-ақ қаржылық шығындардың негізгі қоры жұмысқа тартылған сарапшылардың жалақысына жұмсалатынын айтты. Ресми деректер бойынша республика деңгейінде ғана осы жылға 250 млн теңге жоспарланған. Жергілікті әкімдерге өңірлік комиссия мүшелерін қаржы ресурстарымен және материалдық-техникалық базамен қамтамасыз ету тапсырылды. Сонымен қатар депутат Берік Әбдіғалиұлы Үкіметке Еске алу институтын құру мүмкіндігін зерделеу және қарастыруды ұсынды.Анар ҚОНЫС